Banjur u ADG (NEZ) ïa ka jingïatreilang bad ki Lad Pathai Khubor ban pynkhlaiñ jingtip paidbah

Shillong, Lber 28 : Ka Inter-Media Publicity Coordination Committee (IMPCC) Meeting ka la long mynta ka sngi ha Shillong, hapoh ka jingpeit jong ka Press Information Bureau, Shillong ha kaba la ïadonlang ki nongmihkhmat na ki tnad bapher bapher jong ka Sorkar Pdeng, ki jaka pule ba kham shalor, ki lad pathai khubor, bad ki seng kiba ïadei bad ka kam ïada ri bad ki kam paidbah ban pynkhlaiñ ïa ka jingïatreilang bad kyntiew ïa ki rukom treikam ba ïadei bad ka jingai jingtip paidbah.
Haba ai jingkren ha kane ka jingïalang, u Kripa Shankar Yadav, Additional Director General (NEZ), Tnad Information & Broadcasting u la ban jur ba ka rynsan jong ka IMPCC ka long ban kyntiew ïa ka jingïakren kaba man ka por, ka jingïadei, bad ka jingïatreilang hapdeng ki tnad. U la ban jur ïa ka jingdonkam jong ki sienjam ai jingtip ba ryntih bad u la kren shaphang ka bynta jong ka Press Information Bureau (PIB) bad ka Central Bureau of Communication (CBC) kum ka rynsan ba la buh kyrpang ban pynphriang ïa ki jingai jingtip jong ka sorkar bad ban peit ïa ka jingïadei bad ki paidbah ha ka rukom kaba paka.
U la kren ruh halor ka jingpynbeit ïa ki jingeh jong ki lad pathai khubor, kynthup ïa ka jingpynbna kaba ïalam bakla, bad ban jur ïa ka jingdonkam ban don ka jingïatreilang kaba kham bha hapdeng ki ophis jong ka Sorkar Pdeng bad pynshlur ïa ki tnad ban ïatreilang bad ka PIB bad kiwei kiwei ki lad pathai khubor, kynthup ka Doordarshan bad Akashvani, na ka bynta ka jingai jingtip kaba kham ïar.
U la ai jingmut shuh shuh ban pynlong man ka por ïa kum kine ki jingïakren ban pynthikna ïa ka jingïadei kaba ïaineh bad ka jingïakren kaba don jingktah.
Haba pdiang sngewbha ïa ki nongïashim bynta, u Gopajit Das, Assistant Director ka PIB Shillong, u la ban jur ïa ki jingthmu jong kane ka jingïalang bad pynpaw biang ïa ka bynta jong ka PIB ban pynneh ïa ka jingïadei kaba skhem bad kaba ïajan bad ki lad pathai khubor ha ka jylla.
U la batai bniah shaphang ki kam jong ka PIB, kynthup ïa ka jingpynlong ïa ki Varta bad ki Vartalap, bad u la kyntu ïa ki tnad ban pyndonkam ïa kine ki rynsan na ka bynta ban kyntiew ïa ki sienjam jong ki. U la ai jingtip ruh ia ki nongiashim bynta shaphang ki sienjam ai jingtip ïa ki lad pathai khubor kum ki press tour, kiba pynsuk ban ïoh jingtip shaphang ki kam kiba ïadei bad ka roi ka par lyngba ki nongthoh khubor na kylleng ri.
La pynlong ïa ka jingpynithuh ha kane ka jingïalang, ha kaba ki nongmihkhmat na ki tnad bapher bapher ki la ïasam ïa ki bynta jong ki, ki jingthmu, ki sienjam kiba dang ïaid shakhmat, bad ki jingeh kiba ki ïakynduh ha ka jingïakren bad ka jingai jingtip. Ka jingïakren ka la pynleit jingmut ha kaba tei ïa ki lad pynïadei kiba kham khlaiñ bad ban kyntiew ïa ki rukom pynphriang khubor kiba ïasoh lang.
U Public Relations Officer jong ka Assam Rifles u Lt Col Vikas u la ïaroh ïa ka rynsan jong ka IMPCC kum ka sienjam kaba kongsan, da kaba ong ba kum kine ki jingïalang ki pynsuk ïa ka jingïakren bad ka jingïatreilang hapdeng ki tnad. U la kubur ïa ka jingkyrshan jong ka PIB ha ka jingpynphriang ïa ki jingtip kiba ïadei bad ki kam jong ki bad u la ban jur ïa ka jingdonkam ban nang pynbun shuh shuh ïa kum kine ki jingïakren.
Ka Kong M. Blah, Assistant Professor bad Corporate Cell Coordinator jong ka NIFT Shillong, ka la kren shaphang ka jingtrei jong ka institute ha ka jingïatreilang bad ka Tnad Textiles na ka bynta ban kyntiew ïa ki kam shna jingshna tynrai bad ki kam thaiñ jaiñ. Ka la ai jingïaroh ïa ka rynsan kaba plie lad ïa ka lad pynïasoh bad ka la ïasam ïa ki jingeh kiba la ïakynduh ha ka liang ka jingïakren bad ka la kyrpad ruh ban don ka jingkyrshan halor ka jingpynkhlaiñ ïa ka jingïatreilang bad ka PIB na ka bynta ka jingpynbna paidbah ha ki lad pathai khubor.
U Dr. Atiqur Rahman, Regional Director, na ka regional office jong ka Tnad ka koit ka khiah jong ka sorkarpdeng u la batai bniah halor ka bynta jong ka ophis ha kaba pynïaid bad khmih ïa ki prokram jong ka ri kiba ïadei bad ka koit ka khiah ha ka jylla. U la ong ba ka PIB ka don ka bynta kaba kongsan ha kaba pynphriang ïa ki jingtip kiba ïadei bad ka koit ka khiah, khamtam ha ka por ba don ki jingeh ha ka koit ka khiah jong ki paidbah, bad u la kren shaphang ki jingeh kum ka ktien bad ka jinglah ban ïoh ïa ki jingtip, kiba donkam ïa ka jingkyrshan kaba ïaibteng.
Ka B. Zoramthangi, Head of Programme, Akashvani Shillong, ka la kren shaphang ka jingdonkam jong ki lad pathai khubor ha kaba wanrah ïa ka jingsngewthuh shaphang ki skhim bad ki prokram jong ka sorkar. Ka la ban jur ruh ïa ka bynta jong ka Akashvani ha kaba pynphriang ïa ki jingtip kiba ïadei bad ka koit ka khiah, ka jingpynrung kam ha ka tnad ïadari, bad ki sienjam kiba ïadei bad ki kynthei, bad ka la ban jur ba ka jingïatreilang kaba kham khraw hapdeng ki tnad kan ai jingmyntoi ïa ki paidbah.
U Hemango K. Dutta, Corporate Affairs & Public Relations, IIM Shillong, u la kren shaphang ka jingdonkam ban don ka jingïatreilang kaba kham ïar bad ki lad pathai khubor ban kyntiew ïa ka jingïohi ïa ki kam jong ki jaka treikam. U la ban jur ïa ka jingdonkam ban pynmih ïa ki khubor ba man ka por bad ki prokram ba la pynshong nongrim ha ki jingthoh bad u la pynpaw ïa ka jingdonkam ban pynsaphriang bad pynbna khubor kaba kham ïar ha ki kot khubor jong ka ri, kynthup ïa ki rynsan pathai khubor ha ka Hindi.
Ki nongmihkhmat na ka India Meteorological Department (IMD), u Rivertis Parong bad u Satyendra Kumar, ki la ïasam ïa ki jingshem jong ki halor ki jingeh ha kaba ïadei bad ka jingbatai lypa ïa ka jinglong ka suiñbneng ha kane ka thaiñ bad ki la ban jur ïa ki sienjam kum ka Mission Mausam kaba thmu ban kyntiew ïa ka jingai jingshakri kiba ïadei bad ka jinglong ka suiñbneng ha ka thaiñ Shatei Lammihngi. Ki la pdiang ruh ïa ka bynta jong ka PIB ha kaba pynkhlaiñ ïa ka jingïakren bad ki sienjam ban pynsaphriang jingtip.
U nongmihkhmat na ka North Eastern Institute of Ayurveda & Homoeopathy, Tnad AYUSH u la kren shaphang ka jingbthah jong ka ban kyntiew ïa ki rukom sumar tynrai bad ban ai ïa ka jingsumar kaba lah ban ïoh lyngba ka Ayurveda bad ki rukom sumar kiba ïadei bad kane. Ki nongmihkhmat na ki regional office jong ka Science bad Technology ki la ban jur ïa ka jingdon jong ki lad jingkyrshan ha kaba ïadei bad ka teknoloji ha ka thain shateilammihngi, kynthup ïa ki sienjam wad bniah bad pynroi bad ki prokram ai jingtip kiba thmu ban kyntiew ïa ka thaiñ.
Ki nongmihkhmat na ka Directorate of Information and Public Relations (DIPR), Sorkar Meghalaya, Akashvani, North Eastern Institute of Ayurveda & Homeopathy (NEIAH), North East Centre for Technology Application and Reach (NECTAR), Soil and Water Conservation Department, ki nongtrei jong ka PIB bad CBC bad kiwei kiwei ki ophis jong ka sorkar ki la don lang ha kane ka sngi.
Ka jingïalang ka la kut da ki jingïakren halor ki jingeh kiba ladon lypa, ryngkat bad ki jingïakren kiba la pynsuk ïa ka jingïadei bad kyntiew ïa ka jingïatreilang bad pynkhlaiñ ïa ka jingïakren hapdeng ki nongïashim bynta.