Ïathir ka IIM bad ki riewshemphang halor ki jingkongsan ki rukom thaw ïa ki polisi bad jingwad bniah

Shillong, Lber 28 : Ka IIM Shillong, kaba ïoh jingkyrshan na ka Tnad kam ïalehkai, Sorkar India, ka la pynlong ïa ka international seminar kaba lai sngi kaba la tip kum ka “Youth for Impact: Driving Equity and Innovation in Sports Leadership” mynta u bnai ha ka jaka treikam jong kane ka jaka pule ha Shillong.
Ka seminar ka la long ka rynsan kaba kongsan na ka bynta ki polisi bad ki kam ai jinghikai kaba la pynïasoh lang ïa ki riewshemphang, ki nongthaw polisi, ki nongïalehkai, ki nongpyntreikam, bad ki samla nongwad bniah ban wad bniah ïa ka bynta ba wanrah jingkylla jong ka kam ïalehkai ha ka imlang sahlang. Ka sienjam ka thmu ban kyntiew ïa ka jingïakren bad ka jingwad bniah kumno ki kam ïalehkai ki lah ban nohsynniang ïa ka jingryntih, ka jingkyntiew ïa ka jinglong nongïalam, ka jingsaiñdur thymmai, bad ka roi ka por kaba kynthup lang ïa baroh hapoh ki jinglong jingman jong ki kam ïalehkai.
La sdang ïa ka jingïalang plie paidbah ha ka 6 tarik Lber da ka jingthang ïa ka sharak. U Prof. Pradeep Rathore, Chairpersonu la ai jingbatai shaphang ka seminar bad ka jingthmu jong ka ban pynkupbor ïa ki nongïalehkai jong ka India-khamtam ha ka thaiñ Shatei Lammihngi-lyngba ka jingïakren shaphang ka jingïaryntih, ka jingai bynta bad ka jingsaiñdur thymmai ha ka jinglong nongïalam ha ki kam ïalehkai.
Ha ka jingai jingkren pdiang sngewbha, ka Prof. Naliniprava Tripathy, Director (I/C), IIM Shillong ka la ban jur ïa ka bynta jong ka jinglong nongïalam ki samla ha kaba saiñdur ïa ka lawei jong ka India. Ka la ong ba ka kam ïalehkai ka wanrah ïa ka jinglong ryntih, ka jingtreilang, bad ka jingskhem jingmut katba ka kyntiew ïa ka jingai bynta lang bad ka jingkiew shaphrang jong ki briew. Ka la ban jur ruh ïa ki sienjam jong ka ri kum ka Khelo India, kiba pynkhlaiñ ïa ki kam ïalehkai ha ki jaka nongkyndong bad ai mynsiem ïa ki samla kiba don sap sha ka jingthmu jong ka Viksit Bharat 2047.
Ha kane ka seminar la wan ïashim bynta u Hari Ranjan Rao, IAS, Secretary, ka tnad Sports hapoh ka Tnad Youth Affairs and Sports, Sorkar India, kum u Kongsan. Ha ka jingai jingkren jong u, u la kren shaphang ka jingkylla ha ka jinglong jingman ka kam ïalehkai jong ka India bad u la ban jur ïa ka jingdonkam ban tei ïa ka rukom treikam kaba pynleit jingmut ha ki nongïalehkai bad ba la ïalam da u coach, katba u la ban jur ruh ïa ka bynta ba kongsan jong ki jaka pule kum ka IIM Shillong bad kiwei kiwei ki skul kiba ai jinghikai ha ki kam khaïi pateng ha kaba pynkhlaiñ ïa ka jingpynïaid ïa ki kam ïalehkai.
Ki Symbud Kongsan ki kynthup ïa u Prof. Deepak Kumar Srivastava, Director, IIM Ranchi, uba la kren shaphang ka jinglong kongsan ha ka jingtbit ha ka rukom treikam, ki jingdon jingem ha ki jaka nongkyndong, bad ka jingdon bynta ki kompeni ha ki kam ïalehkai, bad ka Prof. Kalpana Sharma, Vice Chancellor, Lakshmibai National Institute of Physical Education (LNIPE), ka la ban jur ïa ka jingïashim bynta jong ki samla bad ka mynsiem treimon sngewbha ban tei ïa ka lawei jong ka jinglong nongïalam ha ki kam ïalehkai.
Ka jingïalang plie ka la kut lyngba ka jingpynbna shaphang ki jingjia ha kane ka jingïalang bad ka jingkren ai khublei na u Prof. Devansh Pandey, IIM Shillong.
Ka jingïalang ka la sakhi ïa ka jingïashim bynta na ki nongwad bniah na ki ri bapher bapher bad na ka ri, kaba long ka dak jong ka jingpeit bniah ka pyrthei ïa ka jinglong nongïalam ha ki kam ïalehkai. Kaba kham kongsan ka long ba u Ibrahim Adamuna Nigeria u la wanrah ïa ka jingwad bniah kaba la tip kum ka “Sports as a Catalyst for Social Transformation: Empowering Nigerian Youth Toward Equity and Inclusive Leadership.” Ki riewshemphang na kylleng ka ri India, kynthup ruh ïa ki nongïashim bynta na Kashmir, Delhi, Assam, Pune, Mumbai, Lucknow, bad kiwei kiwei ki bynta jong ka Uttar Pradesh, ki la nohsynñiang lang ha ki jingïakren.
Ka jingïalang ka la don ruh artylli ki jingïakren kiba la pynïasohlang ïa ki nongthaw polisi, ki nongïalehkai, ki riewshemphang, bad kito kiba don bynta ha ki kam karkhana.
Ka jingïalang kaba nyngkong kaba la tip kum ka “Sport 2.0 – Technology, Inclusion, and the New Meaning of Success,” ba la pynïaid da u Prof. Devansh Pandey, la donlang u Dr. Subhash Basumatary, Regional Director barim jong ka Sports Authority of India; u Jayanta Talukdar, u nongsiat khnam uba la ïakhun ha ka lympung ïalehkai Olympics, Prof. Laishram Thambal Singh, Professor bad Head of Physical Education and Sports Science ha Manipur University; bad u Dulon Banjop Kharsati, Nongseng jong ka Dubakh Sports Pvt. Ltd. Ka jingïakren ka la ban jur kumno ka teknoloji, ki polisi ba ai bynta lang ïa baroh, bad ki rukom treikam ba ïatreilang ki pynkylla dur biang ïa ka jingjop ha ki kam ïalehkai jong kane ka juk.
Ha kawei pat ka jingïalang, kaba la pynïaid da u Prof. Ravi Shankar Bhakat, IIM Shillong, la ïadonlang u Kausar Jamil Hilaly, IAS, Special Secretary, Tnad Sports & Youth Welfare, Assam; ka samla Rifiness Glory Warjri, ka samla na Meghalaya kaba rit tam ka rta kaba la kiew ïa u lum Everest; bad ka samla Phoebe Dale Nongrum, kaba dang ïakhun mynta ha ka Formula 4 bad ka Ahura Racing ha ka JK Tyre National Racing Championships. Ki riewshemphang ki la ïakren shaphang ka jingkyntiew ïa ka jingryntih, ka jingai bynta lang ïa baroh bad ka jinglong nongïalam jong ki samla hapoh ka jinglong jingman ka kam ïalehkai.
La wanrah haduh 17 tylli ki research paper ha kane ka jingïalang, kiba kynthup ïa ki phang bapher bapher hapoh ka jinglong jingman ka kam ïalehkai. Ki jingïakren ki la ban jur ïa ka bynta kaba nangkiew jong ka teknoloji bad ka jingpeit bniah ïa ki jingtip ha ka jingpynïaid ïa ki kam ïalehkai bad ka jinglehkai bha jong ki nongïalehkai, bad kumjuh ruh ïa ka jingdonkam jong ka kam ïalehkai ban kyntiew ïa ka jingai bynta lang ïa baroh ha ka imlang sahlang bad ban weng ïa ki jingbym ryntih.
Ki la don ruh ki bynta kiba peit ïa ka jingïashim bynta jong ki samla ha ka jingpynïaid ïa ki kam ïalehkai, ka jingsaiñdur bad ka jingseng kam seng jam ha kaba ïadei bad ka kam ïalehkai, bad ki rukom treikam ban pynkhlaiñ ïa ka kam ïalehkai jong ka India. Kiwei pat ki phang ki kynthup ïa ka jingpynïaid ïew ïa ki kam ïalehkai, ka jingïaryngkat hapdeng shynrang bad kynthei, ka jingithuh ïa ki sap, bad ka sports science, kaba pyni ïa ka jinglong kaba nang kiew bad kaba ïadei bad ka jingbun ki bynta jong ka jinglong nongïalam ha ka kam ïalehkai.
Ha kane ka seminar la pynkup burom ïa u Sagar Kumar na Jawaharlal Nehru University da ka khusnam Best Paper Award halor ka paperjong u kaba la ai kyrteng “The Behavioral Inequality Trap in Indian Sports.” Ïa kane ka khusnam la ai da ka Prof. Naliniprava Tripathy, Director (I/C), IIM Shillong.
Kiba la ïashim bynta ha kane ka seminar ki kynthup ïa ki delegate na ka MYBHARAT/NYKS, ki samla pule na ka Lady Keane College (NSS) bad Shillong College (NSS), kumjuh ruh ki samla pule na ka PGP programme jong ka IIM Shillong.
Kum shi bynta jong ka seminar, ki nongïashim bynta ki la leit jngoh ïa ka museum, kaba la plie lad ïa ki ban sngewthuh ïa ka pateng ba riewspah ha kaba ïadei bad kolshor bad ki riti dustur jong ka thaiñ shatei lammihngi Ka jingleit jngoh ka la ai ka jingsngewthuh kaba kham bniah ïa ki nongïashim bynta shaphang ka jinglong jingman kaba ïar jong ka thaiñ.
Ka seminar ka la kut lyngba ka jingpyni ïa ka kolshor, kaba rakhe ïa ka jingïatreilang bad ki jingïakren hapdeng ki nongïashim bynta.
Kane ka seminar ka la pynbiang ïa ka rynsan kaba pynïasoh ïa ki jingwad bniah, ki jingïakren halor ki polisi, bad ki jingsaiñdur kiba thymmai kiba ïadei bad ka jinglong nongïalam ha ka kam ïalehkai, kaba pynskhem ïa ka jingdonkam kaba nangkiew jong ka kam ïalehkai kum kaba plie lad ïa ka jingpynkupbor ïa ki samla, ka jingkylla ha ka imlang sahlang, ka jingsaiñdur ïa ka teknoloji, bad ka jingsynshar kaba ai lang ïa baroh.