Shillong, Lber 02: Ka sorkar jylla ka la mang pisa T. 280 klur tyngka ban shna pynheh ïa ka surok na Weiloi sha Phlangwanbroi ha kane ka surok kaba la tip kum ka Mawphlang- Balat- Ranikor Road.
Ka jingjurip ban pynheh ïa kane ka surok ka la long naduh ki por mynshuwa, katta na Baghmara sha Ranikor, Balat sha Mawsynram sha Mawphlang, hynrei na ki daw kiba ym lah ban tip ha ka jinglong Myntri Rangbah u Dr. Mukul la pynkylla bad mynta ka sahkut noh tang ha 18-Ranikor.
Hadien ba la duh noh ïa kane ka skhim u Myntri Rangbah ka jylla ba mynta u la pynbna ha ka jingïalang ha Mawkyrwat shuwa ka elekshon 2023 ban shna pynbha bad pynheh ïa ka surok na Mawphlang sha Weiloi ha kaba ka jingtrei mynta la dep bad ka leit ka wan ka la suk shibun.
Kane ka jingpynbna ka sorkar ban shna pynheh noh ïa ka surok na Weiloi sha Phlangwanbroi ka la pynkmen ïa ki nongshong shnong katei ka thaiñ bad ka jingangnud ka long ban pynbha shaduh 18- ha Ranikor ban pynïasoh bad ka surok ba la shna bha na Baghmara sha Ranikor.
