Khur i heprit Shelevah Jyrwa ïa khusnam ba `1lak tyngka na ka Sur Kynud 4

Shillong, Lber 02 : I heprit Shelevah N Jyrwa na Laimer, Upper Shillong i la ïoh ban rah khur ïa ka song pisa ba 1lak tyngka hadien ba i la rah ïa ka nam lahduh jong ka Sur Kynud Season 4 kaba la pynhap pyrda noh ha ka rukom kaba shongkun bha kaba long ha ka janmiet sngi Thohdieng ha Don Bosco Youth Centre, Laitumkhrah Shillong.
Ïa kane ka jingïakob rwai la wan ban pynshongkun da ka jingdonlang ka MLA jong ka Shillong East Dr. M Ampareen Lyngdoh, nangta u General Councillor u Fr. Fidel Orendain na Rome, Provincial ka Shillong Province u Fr. John Zosiama, bad bun ngut ki Phadar na South Asia nalor kiwei kiwei ki riewniam bad ki kmie ki kpa bad bahaiing jong ki phra ngut ki nongïashim bynta kiba la poi sha ka final.
Ha kane ka grand finale kaba la pynbit pynbiang da ka Don Bosco Media Network Television hapoh ka jingïalam jong u Fr. Michael Makri kum u Director, ki la don haduh 8ngut ki samla kiba la poi sha ka kylla ba khatduh ban ïa knieh ïa ka song pisa kaba 1lak tyngka.
Naduh kaba sdang na ka liang ka DBMNTV lyngba ki coach ba la buh kyrpang ba kynthup ïa i Samla Lapdiang bad samla Kheiñkor, ki ai ruh ka jinghikai ban pynjanai ïa ka sap jong kitei ki heprit bad ki samla kiba wan aireng ha katei ka lympung.
Ha shwa kane ka MLA haba kren ha ka jingïalang ka la ai ka jingïaroh kaba khraw ïa ki bor pynïaid jong ka Sur Kynud da kaba ong ba kino kino ki kam ba ki riewniam ki leh kadei kaba janai khamtam lei lei haba ïadei bad ki samla.
Ha kajuh ka por ka la ai ruh ka jingïaroh ïa ka Don Dosco Youth Centre kaba la lah ban pynlong ïa katei ka rynsan ïakob rwai kaba long ka rynsan ïa ki samla ban pynjanai ïa ka sap ba kyrpang ba ki don. “Dei lyngba kum kine ki jingïakob la ka long ha kino kino ki lympung kiba pynlong ïa ki samla ban trei shitom ba kin poi sha ka thong,” ka la ong.
U Director ka DBYC Fr. Michael Makri ha ka jingkren u la ong ba ka jingseisoh jong kane ka prokram naduh kaba sdang ka dei na ka jingkyrshan met bad mynsiem jong ki bor bahalor, nangta ki nongïarap kiba ai kylluid mynsiem kynthup naduh ka sorkar jylla bad kiwei kiwei. U la pynpaw ka jingsngewnguh ïa ki Kmie ki kpa kiba la kyrshan ïa ki khun naduh kaba sdang khamtam ban wan buh wan shaw bad tad haduh ban da kut kane ka lympung.
Ha kane ka sngi la sam ruh ïa ka Cecilia Memorial Award sha u Br. Sniawshngain Papang bad kumjuh ruh ïa ka DBMNTV Youth Icon Award 2025 sha u Bah Herbert Kharkongor, Superintendent of Police ka West Khasi Hills, bad kumjuh ka jingai sngewbha sha ki nongbishar jong katei ka jingïakob.
Kumba ju long manla u snem ki nongjop ha kane ka lympung ïa kob nalor ba ki ïoh khur ïa ka khusnam pisa kaba kot haduh 1lak tyngka kin ïoh ruh ïa ka kabu ksiar wat ban leit shim bynta ha ki lympung kiba heh jong ka ri bad jong ka pyrthei ruh kumjuh.
Kane ka long katkum ka kyrwoh ba la phah da u Director ka Don Bosco Youth Centre, Fr. Michael Makri.