Shillong, March 2: Ki bor pynïaid District jongka East Khasi Hills mynta ka Sngi Nyngkong, ki la pynlong ka jingai jinghikai ne ka “Career Guidance Programme” ban hikai lypa ïa ki samla ki ban ïakhun ban ïoh rung kam shipai ha ka Agniveer (Indian Army) bad Agniveervayu (Indian Air Force) na ka bynta u snem 2026.
ïa kane ka jinghikai bad batai la pyllong ha Soso Tham Auditorium, bad la ïadon lang ki heh ophisar shipai ka ri bad ki bor pynïaid District ban ai ïa ki jingtip kiba bniah, halor ki kyndon kiba lah ban aplai ïa ka kam, ka jingdon ïa ka rynnïeng rynniot bad ïa ka jingkhlaiñ ha ka met ka phad bad ka jingïaid ki kam ki jam ha ka jingjied lyngba ka Agnipath scheme.
ïa kane ka prokram la pynbit pynbiang da ka Deputy Commissioner ka Kong R.M. Kurbah ryngkat bad u Additional Deputy Commissioner Bah S.Warjri, ïa ka jingai jingbatai ïa ka rukom pynklhreh la ïoh na u Col. Vinay Kumar, Director jongka Army Recruiting Office, u Retired Lt. Colonel u Bah Sebastian Marbaniang uba long u Zila Sainik Welfare Officer bad ki riewshemphang na ka Indian Air Force.
Ka Deputy Commissioner kala kyntu ïa ki samla ba ki dei ban shim ïa kane ka kabu bad ka ong ba ïa kine ki rally pynrung kam yn pynlong ha Shillong ban pynthikna ba ki samla na kylleng ki thaiñ kin ïoh ïa ki lad ban ïashim bynta.
Kala pyntip ba ha u snem ba la dep, ki la don palat ïa ka 700 ngut ki samla kiba la ïoh rungkam ha ka Agniveer Scheme bad ha ka BSF bad kane ka long ka dak jong ka jingsakhi ba ka la don ka jingkiew ha ka jingsngewtynnad ki samla lyngba kine ki jingpyrshang kiba la shim lyngba ka career guidance.
U Col. Vinay Kumar ula batai shaphang ka jingpynrung kam ha ka Agniveer 2026 ha ka Indian Army, ha kaba ka jingthep kyrteng kan kut ha ka 1 tarik u Iaiong 2026 bad ka Online Entrance Exam kan long naduh ka 1 tarik haduh ka 15 tarik u Jylliew 2026 bad ula kyntu ïa ki samla ka Meghalaya ba kin ïaleh ban pyndep ïa ka jingthep kyrteng hapoh jong ka por kaba la buh.
Ki nongmihkhmat jongka Indian Air Force ki la pynbna ba ka jingpynrung kam ha ka Agniveervayu na ka bynta ka thaiñ shatei lam mihngi baroh kawei kan long ha ka 20 tarik u Lber 2026 ha ka Headquarters jongka Eastern Air Command.
Ka jingjied ïa ki samla kan kynthup ïa ka jingbishar ïa ka Physical Test bad ïa ka Written Examination bad hapoh jongka Agniveervayu Scheme, haduh 25% na ki nongshah thungkam kin shah pynrung syndon kum ki shipai kiba pura bad kane kan shong katkum ka jinglah bad ka jingtbit ka jongki.
Ki heh ophisar ki la banjur bad pynshlur ïa ki kynthei ba kin mih shakhmat ban ïashim bynta ha kane ka jingpynrung kam shipai ka ri bad ki la kyrpad ïa ki samla kiba la pynrung kyrteng ba ki dei ban peit ruh na ka portal jong ka Agnipath ban ïoh ïa ki jingtip kiba bniah ne ïa kino kino ki jingpynbna.
