Sha ki Pulit aiti ka KSU Eastern Border Area ïa u bar jylla ba kam doktor khlem ki kot ki sla ba biang

Shillong, Lber 2 : Ka Khasi Students’ Union North Khasi Hills Eastern Border Area mynta ka 2 tarik Lber 2026 hadien ba ka la ïoh jingujor na ki paidbah ba la don u uwei u bar jylla u ba kam ïalade kum u Doctor uba tip kyrteng kum u Syed Nazir Shah bad u buh ruh ïa ka dukan clinic ba khlem don ka signboard bad ki kot ki sla ki bym biang ha ka shnong Umraling kaba hap hapoh ka Mawlasnai Police Outpost.
Ka seng tang shu ïoh jingtip ka la hiar mardor ha katei ka shnong Umraling hapoh ka jingïalam jong u samla Banjop Maring president KSU Eastern Border Area ,u samla Augustin Shadap Asst Education Eastern Border Area bad ka la lap shisha ba don u bar jylla u ba kam ïalade kum u Doctor bad u buh ruh la ka dukan clinic bad ha katei ka clinic u ai injection bad ki drip ïa ki paidbah kiba wan shim dawai ha katei ka jaka,bad katei ka clinic ka long kaba isaitmet ban peit ha kaba ka kamra sumar bad ka jaka shet ka long ha kajuh ka kamra bad kaba jakhlia haduh katta katta bad ka sngew lyngngoh ka dei ba wat ïa ki thyrnia injection kiba la dep ban pyndonkam u buh ha kajuh ka kamra bad lada kylli ïa u shaei u bret ïa ki thyrnia u jubab ba u ai ïa ki nongtam tin jot.
Kumta na ka liang ka seng ka la beh mardor ïa utei u bar jylla ba kam ïalade kum u Doctor bad ban aiti noh ïa u ne bar jylla sha ki Pulit jong ka Mawlasnai Outpost .
Ka seng ka kyntu ruh ïa ki shnong bad ki nongïalam shnong bapher bapher ba kin nym dei ban ailad ïa kum kine ki jaitbriew khamtam kaba ïadei bad ka im ka iap jong ka jaitbynriew.