Shillong, Lber 02: Ka thma ktien halor ka jingai syrnot ban ïakhun ïa ka elekshon sha GHADC ka Garo Hills ka la nang kiew ha kaba u MDC barim ka 17- Balachanda Constituency, u Sofior Rahman ula kynthoh ba ym don kawei ruh ka kynhun kaba lah ban kam trai kyrpang halor ka synshar paidbah ha ri-lum Garo, haba pynpaw ba ka thaiñ ka dei jong baroh ki briew ba la ïoh ïa ka hok ban shong shnong bad ba la im la sah da ki phew snem ha kane ka jylla.
Katkum ka khubor ba la ïoh la ong ba kane ka jingkynthoh u Rahman ka la wan kum ka jubab ïa ka jingkynthoh ba dangshen jong u MDC Rinaldo K Sangma haba ïadei bad ka jingdonkam ïa ka syrnot Scheduled Tribe (ST) ban ïakhun ïa ka elekshon Garo Hills Autonomous District Council (GHADC).
Katkum ka kyrwoh ba la pynlait ha ka sngi Nyngkong, u Rahman ula ong ba ka long kaba donkam ban buh jingthoh ïa katto katne ki jingshisha katkum ka riti synshar ba ïadei bad ka bor bad u pud jong ka GHADC hapoh ka Sixth Schedule jong ka Riti Synshar ka Ri.
U la ong ruh da kaba pynshai ïa ka nongrim katkum ka riti synshar, ula ong ba katba ka Sixth Schedule ka ai ïa ka jingsynshar ba laitluid ïa ki Autonomous District Council ban ïada ïa ki riti dustur, ka khyndew ka shyiap bad ki jingleh tynrai, kam shym la buh pat ïa ki halor jong ka riti synshar ka ri.
U la ong, “Ka Council ka treikam hapoh ka riti synshar bad dei ban burom ïa ka hok synshar paidbah jong baroh ki briew kiba la ïoh ïa ka hok kum ki nongshong shnong kiba sah ha ka thaiñ.”
Ha kaba ïadei bad kane haba kdew ïa ka paragraph 2 bad 3 jong ka Sixth Schedule, ula ong ba la aibor ïa ki District Council ba kin thaw aiñ halor ki kam ba ïadei bad ka jaka, ka riti dustur bad ka synshar tynrai. Hynrei, ula ban jur ba kano kano ka jingpyrkhing ïa ka jingïashim bynta ha ka saiñ pyrthei ka dei ban don ïa ka nongrim kaba skhem katkum ki aiñ.
U La ong, “Kano kano ka jingpyrkhing ïa ka jingïashimbynta ha ka saiñ pyrthei ka dei ban kyrshan da ka bor ba ïoh na ka riti synshar, ka aiñ kaba biang, bad ka jingpynbna na u Lat ka Jylla- ym da ka jingbatai saiñ pyrthei ne ka jingsngew.”
U Rahman ula pynpaw ruh ba ym lah ban shu kyntait ïa ka hok tynrai bala pynkup hapoh ka riti synshar. Ula kdew ïa ka Article 14 (jingïalong ryngkat kyrdan hakhmat ka aiñ, Article 15 ka jingkhang ban ibeiñ, Article 19 ka hok ban kren bad pynpaw ïa ki jingsngew bad Article 326 ka hok thep vote kum ki jingïada ba kongsan.
U la ong, “Ki nongshong shnong bar Jylla bad wat ki bym dei ki Garo ki la sah ha ka thaiñ da ki pateng bad kila synniang sha ka roi ka par jong ka imlang sahlang bad ka ïoh ka kot.
Na ka liang jong u, u la banjur ba ïa ka GHADC la pynkha ba kan ïada ïa ka jinglong ba kyrpang ki riewlum hapoh ki kyndon ka riti synshar ka ri, ym ban kyntiew ïa ka jingkyntait ïano ïano kiba dang dei hi ki nongshong shnong jong ka jylla.
