Bunsien ngi ki paidbah ngi imsngi tangban kynnoh hynrei ban ïaroh te kham niar ban ïohi. Lada ka sorkar ka pyrshang ban trei ruh kaba bun hi ka jur ka jingshah kynnoh. Ym lah ban len haba ngi kynnoh ruh ngim don ki jingpynshisha hynrei tang shu ïoh sngew ba uwei u ong ba kane ka sorkar ka long kumta ne ka long kaba bamsap tang katta la ia kynnoh lang baroh baroh.
Balei ba ong kumta katno tharai na ngi kiba la poi sha ka New Shillong bad shang bun ki jaka hapoh ka New Shillong. Lada phim pat ia poi sngewbha ïaleit peit hi da la ki jong ki khmat phin ïohi haduh katno kata ka nongbah Shillong kaba thymmai ka la kylla dur shisha. Mynta sa tang katto katne por ka Assembly ruh lah dep, nangta ka jingtei ia ka Secretariat ba thymmai ruh ka dang ïaid. Bun ruh kiwei kiwei ki jingtei kiba la ïaid shakhmat bad la jan dep mynta. Ynnai da ïakren ïa ki surok namar lada phi phai lei lei sha ki surok phin ïohi ba ka la don da shisha ka jingkylla namar kiba bun kiba la dep trei ruh la ïohi shisha ïa kata ka jingkylla bad kiba dang trei ruh ki dang ïaid shaid shaid shakhmat.
Kumba long mynta kane ka nongbah Shillong jongngi ka la khapngiah palat da shisha namar kam don plan naduh ba sdang, ki surok ruh ki rit bad ki kali ki la nang bun, khlem pep tang shu lah dep ka New Shillong bad pynkynriah lut ïa ki ophis sha katei ka jaka kan ïarap ïa kane nongbah Shillong ba rim kan kham kylluid noh bad ka jingdheng kali ruh kin kham duna noh namar ka sor bah kan dei beit sha New Shillong. Ka jingthmu jongka sorkar ba ynda la dep ka Nongbah Shillong kaba thymmai kin bun bah ki samla ki ban ïoh jingmyntoi bad ïoh kam ïoh jam. Ka jingioh kam ïoh jam kam mut eh tang ha ki kam sorkar hynrei wat ha kiwei kiwei ki jait kam ruh kiba lah ban ïeng ha la ki jong ki kjat ruh.
Dang shen u Myntri Rangbah haba ai jingkren hapoh ka ïing Dorbar Thawaiñ ka jylla u la ong ka New Shillong ka long kum ka engine pynroi ka Meghalaya-ba la tei bad pynïeng nongrim ha ki saw tylli ki paia : ka tourism, sports& culture, education & skilling bad technology. Ryngkat lang, kine ki tnad kin khring ïa ki karkhana thymmai, thaw ïa ki lad thymmai, bad pynmih palat 1.5 lak ki kam, ka ban pynlong ïa ka New Shillong kum ka jaka pdeng ha ka jingïohkam ki samla jong ngi.
Ki kam ki la ïaid bha ha ka jingtei ïa ka sor New Shillong, Ka Administrative City, ka ban don ki Ophis treikam ba kongsan kum ka Meghalaya Legislative Assembly, Meghalaya Secretariat, ka IIM Shillong, NIFT, NEIAH bad NEIGRIHMS, ka ban pynlong ïa ka knowledge bad Healthcare hub.
Ka project Meghalaya Secretariat ba 1,231 klur tyngka ka la ïaid ka kam ban tei kumba 35%, bad ka Legislative Assembly Building kala jan dep artad,
Ka thaiñ kan sa nang kylla ruh kum ka jaka ïathied ïapet lyngba ka Unity Mall bad ka jingtrei ka la ïaid mynta 40% bad ki surok ban don ki dukan kiba la plan bha.
Haduh 64.9 acre ka jaka la buh ban shna ïa ki jaka pule higher education bad skilling bad ka IT Park kaba lah ban pynmih haduh 1500 tylli ki kam.
Ka plan shna ïing ka kynthup ïa 51.68 are ban tei ïa ki ïingsah, bad 10.9 acre ïa ki iingsah kiba jem dor ki ban don 435.
Ka Knowledge City ha Mawkhanu, kan don ïa ka IT park kaba heh, ka Skill & Innovation Hub, ka Monolith Tower bad ka Football Stadium ba don 40,000 ki jaka shong.
Kine ki jingtei kin thaw ïa ka ïoh ka kot ba thymmai bad kin pynmih ia ki kam ki jam
Ka projek ka buh hakhmat eh ïa ka jingpynneh pynsah ïa ka mariang, ki madan shnong, bad ka jingthaw kam thaw jam, ha kaba 85.9 akar la mang na ka bynta ki park bad ka madan ba khlem jingker. Bun kiwei kiwei ki projek kiba dang ïaid ka jingtrei mynta bad ka thong hi ka long ba hapoh kine ki khyndiat snem ka sorkar kan pynkynriah lut sha New Shillong khnang ban pynkylluid ïa kane ka nongbah Shillong kaba rim.
