Shillong, Lber 1 : Ki don haduh 19 tylli ki jaka ai jingsumar ha kane ka jylla kiba kynthup naduh ki clinic bad ki hospital kiba treikam khlem da ïoh jingbit ne khlem ki license. Kane ka long kat kum ka kaiphod na u Comptroller and Auditor General of India (CAG) ha ka bynta jongka Social and Economic Sectors bad Urban Local Bodies kat haduh u Lber 2023.
Kine ki jaka ai jingsumar ki kynthup ïa ki Clinic, ki Diagnostic Centres, ki Pharmacy bad ki hospital kiba don ha East Khasi Hills, Ri Bhoi, West Garo Hills bad West Jaintia Hills.
Tang hangne ha nongbah Shillong ki jaka sumar bym don license ki long ka Brightwell Clinic, (Barik), NE Diagnostic Centre (Malki), C.P Lab (Jail Road), Merida Diagnostic Lab (Jail Road), Shillong Heart Clinic (hajan Bethany hospital), Eye Care and Contact Lens (Police Bazar) bad MK Diagnostic Centre (Fire Brigade).
Kiwei kiwei pat ki hospital ki kynthup ïa ka Bethany Hospital (kaba la plie naduh 2014), Ri Bhoi pharmacy (naduh 1993), Syngkli Pharmacy (2018), Doctor’s Clinic, Nongpoh (naduh 2016) ha Ri-Bhoi, Tura Christian Hospital (kaba la plie naduh 1918), Geriatric Clinic (naduh 2021), Donear Pharmacy (naduh 2010), Tura Metro Pharmacy (naduh 2021) bad City Medi Clinic & Laboratory (naduh 2013) kine ki dei ha West Garo Hills. Ka Florence total Women & Maternity Care cum Diagnostic Centre, Endo Clinic and Jada-el-clinic ha West Jaintia Hills.
ïa kane ka jingleit jurip la pyndep da ki briew ka CAG ha u Risaw 2022. Kane ka jingplie khlem da ïoh license ka la pynlong ïa ka CAG ban shim khia ïa ka kam khamtam ba ka dei shaphang ka koit ka khiah.
