Shillong, Lber 01 : U Myntri Rangbah ka Jylla, Conrad K Sangma u la kam ba ki don ka jingkyrmen ba la kumno ha u snem ban wan kata ha u 2027 kin lah ban pynkynriah noh ïa ka Meghalaya Secretariat sha ka Secretariat ba dang thymmai kaba don ha New Shillong.
Ïa kane u la pyntip ha Iing Dorbar Mangtyngka kaba dang shu kut shen haba jubab halor ka jingïatai halor ka Mangtyngka mynta u snem.
“Tang ha kine ki lai bnai mynta phi la ïohi ba ka kam ka la ïaid haduh 30 persen bad kumta ngi khmih lynti ba la kumno kumno ha u snem ban wan ngin sa lah ban pynkynriah noh sha ka jingtei ba thymmai,” u la ong.
Ha kajuh ka por u Myntri Rangbah u la ïathuh ruh ba ka sorkar ka don ïa thong na ka bynta ban wanrah ïa ka jingkylluid ha Shillong City da kaba sdang ban pynkynriah ïa ki nongdie madan ha kylleng ki bynta jong ka sor Shillong.
“Ngin ïai bteng ïa kane ka kam bad ngi khmih lynti ba ha ki khyndiat snem ban wan ngin sa lah ban pynbeit bad tehlakam ïa kane,” u la ong.
La kdew ruh ba haduh mynta ki la don haduh 394 ngut ki nongdie madan ha Shillong kiba la dep ban pynkynriah, kata haduh 365 ngut ha Khyndailad bad 29 ngut pat na jan Civil Hospital sha ka jaka ba la pynkhreh kyrpang.
Shuh shuh la kdew ruh ba ha kane ka sienjam la ai mar 20,000 tyngka sha kitei ki nongdie madan bad mar 10,000 tyngka ka jingiarap kyrshan pisa la ai sha ki nongdie jingdie kiba don ha Iewduh.
