Shillong, Rymphang 27 : Ka Khun Hynniewtrep National Awakening Movement (KHNAM) ka la dawa ïa ka Sorkar Jylla ba kan pyntreikam ïa la ka jong ka jingpynbna (notification) ba pyndam noh ïa ka personal interview ha ka thungkam Groupd-D hadien ba ka Tnad General Administrative Department ka la khot ïa ki kyrtong ban wan sha ka interview la 6 tarik Lber.
Ha ka shithi sha u Chief Secretary, u Working President ka KHNAM Bah Thomas Passah ula pdiang ïa ka rai jong ka Sorkar ban pynduh noh ïa ki Interview ha ka thungkam Group-D, ka jingpynkylla kaba ka party ka la iai dawa na ka bynta ka kam Group-B, C bad D.
Ka seng ka ong ba ka long kaba lyngngoh ba ka Tnad GAD ka la pynmih ïa ka jingpynbna laitkam kum ki room bearer, peon, sweeper bad cleaner ha Meghalaya House, New Delhi bad hadien la phah ïa ki shithi ban wan sha ka interview.
“U Under Secretary ka GAD ula phah ïa ka shithi ba khot sha ka personal interview kaba la buh ban long ha ka 6 tarik Lber 2026, kaba long pyrshah ïa ka jingpynbna ba la pynmih da ka Sorkar ha ka 29 tarik Nailur 2025” ong ka shithi.
