Shillong, Rymphang 27 : Ka Voice of the People Party (VPP) ka la pynpaw ka jingsngew thikna ba kan jop biang ïa ka MP Lok Sabha na kane ka Shillong Parliamentary Constituency ha ka elekshon shiteng samoi, ong u President ka VPP bah Ardent Basaiawmoit ha ka sngi Thohdieng.
“Ngin dang ban rai (halor u kyrtong) bad ngin sa ïakren shen ïa kane ka kam” ula ong.
Une u Nongïalam ka VPP ula pynpaw ba ka party kam donkam satia ïa ki briew ba nabar ba kin jop ïa ka elekshon shiteng samoi haba kynthoh ïa ki jingïakren shane shatai.
“Nga ïathuh ïa phi, ngi don bun ki briew ha ka party kiba la biang ka kyrdan, kiba sngewthuh ïa ka nongrim, ka thymmei jong ka party. Ngam tharai ba ngi donkam ki briew ba nabar ka party ba kin ïakhun ïa kane ka elekshon”.
ïa kane ka elekshon shiteng samoi yn hap ban pynlong hadien ka jingkhlad kyndit jong u MP ka Shillong u Dr Ricky AJ Syngkon myn ha ka 19 tarik Rymphang.
