Shillong, Rymphang 27: U Myntri Rangbah ka jylla u Conrad K. Sangma haba jubab ïa ka jingkylli ka Miani D. Shira la ong ba kiba la ïoh jingbit ban trei par mar ha u snem 2024-2025 ki long phra tylli ha u snem 2025-2026 ki long khatar tylli. Ki trai laisen kiba la wan ban pynthymmai ha u snem 2024-2025 ki long 32 tylli bad u snem 2025-2026 ki long 37 tylli.
Haba jubab ïa ka jingkylli bynrap haba ïa dei bad ka jingdon ki nongtrei u Myntri Rangbah u la ïathuh ba ka ophis jong ka Meghalaya State Pollution Control Board ka don ha Shillong bad ka shnat trei kam ka don ha Tura kaba ym pat biang ki nongtrei bad ki paidbah ka thaiñ Garo Hills ki la ïa kynduh jingeh ban pynsuk ïa ki paidbah shen ka sorkar kan sa buh noh ïa ka ophis trei kam ha Tura.
Haba jubab pat ïa kiwei ki jingkylli ïa ka jingdon ki par mar beaiñ u Myntri Rangbah u la ong ba ha u snem 2024-2025 la khang khyrdep 11 tylli bad ha u snem 2025-2026 la khang khyrdep 29 tylli bad ka jingpynshitom ïa ki ka long kat kum ki kyndon jong ka MMDR Act, haba phai tang ha ri Bhoi District ki par maw ba trei beaiñ ki don phra tylli.
Ïa ka jingkylli la katno tylli ki applikashon ki la ïoh bad katno tylli la ai ïa ka jingmynjur u Myntri Rangbah u la ong ba ïa kane u donkam jingtip namar ki don kiba la ïoh ki don ki bym pat ïoh kumta un sa ai ïa ka jingtip hapoh ka ïing dorbar, haba phai tang sha West Garo Hills District ka jingdon ki par maw ba la tih beaiñ ki don 59 tylli.
