Shillong, Rymphang 27: U Symbud Myntri Rangbah ka jylla u Bah Prestone Tynsong haba jubab ïa ka jingkylli ba la wanrah da u Bah Brightstarwell Marbaniang la ong ba ka National Highway-6 naduh Jorabad haduh Mih Myntdu kaba ïaid lyngba ka Shillong bypass ka surok ka bha lait noh ha ki bynta na Sonapur sha Ratacherra kaba ka jingtrei ban pynbha ka dang ïaid shakhmat bad ka NH-6 kam shym ïaid lyngba ka Mawlai.
Haba jubab ïa ka jingkylli bynrap ka NH-106 na lad Umroi sha Shillong ka sorkar ka la ai sha ka NHIDCL bad halor kane ka la don ka jingïakren ba kumno ban wad ki lad ki lynti ban pynheh ïa ka surok na lad Umroi ri Bhoi District ban poi sha Shillong, u Myntri u la ong ba ki ïa kynduh shibun ki jingeh ha ki katto katne ki bynta ban pynheh ïa kane ka surok.
Ha ka jingïakren la ïa pyrkhat ban shna ïa ka surok ka ban tynrong ha suiñ kum ka jingkieng kaba ki khot Elevated Road hadien ba la jurip bniah da ka NHIDCL kam ïahap bad ïa kane ka jingpyrkhat la hap ban pynsangeh noh, kawei pat ka long ban shna ïa ka surok Four Lane da kaba pynïaid na sharud bynta ka Mawlai, Mawprem ban poi sha Umshyrpi bad kawei pat ka jingpyrkhat ka long ban pynheh ïa kane ka surok kaba mynta da 12 metre ryngkat ki lynti ïaid kjat.
Haba ïa dei pat bad ka jingrit ka surok ïaid kali ha ISBT u Myntri u la kubur ba ka dei ka jingshisha ba ha kane ka bynta ka don ka jingeh ban pynheh ïa ka surok namar ka don kawei ka jaka jong ki riew shimet kaba ka sorkar ka dang ïa kren mynta lada ki treh ban kohnguh ïa kaei kaba ka sorkar ka kwah lada ïoh ïa kane ka jaka kan thied ka jaka ban rung sha ISBT kan nym don jingwit shuh.
