Buh jingkylli ki nongïalam ka liang pyrshah ha kaba ïadei bad ka jingpynlut pisa ka CM Secretariat

Shillong, Rymphang 26: Ki nongïalam ka liang pyrshah ki la wanrah ïa ka mat ha kaba ïadei bad ki kam ba la pyntreikam da ka Chief Minister Secretariat ha kaba ïadei bad ki jinglut jingsep ha ka sngi Palei.
Halor kane na ka liang jong u nongïalam ka liang pyrshah uba dei ruh u MLA ka Nongkrem Constituency u Bah Ardent Miller Basaiawmoit haba wanrah ïa kane ka mat ha ka jingïatai nia ha ka Cut Motion u la ong ba ka jingpynlut ka T. 23.20 klur ha kaba ïadei bad ka Council ki Myntri ka la kiew sha ka T. 26 percent na ka snem kaba la dep kaba long kaba la kiew bha.
U la buh ruh ka jingkylli la ka rukom treikam jong ka sorkar ka long kaba biang ne ka la kiew sha ka 26%, buh jingkylli u Bah Ardent.
Katkum ka jingong jong u, ka jingpynkiew ha ka bhah mang tyngka ka lah ban long na ka daw ka jingthied ïa ki kali kiba thymmai ïa ki Myntri Sorkar bad ki jingïoh jingmyntoi jong ki.
U la ong ruh ba kane kam dei satia ka kam pynroi ha kaba iadei bad ka jingpynlut ia ki myntri Sorkar.
Na ka liang jong u nongialam ka liang pyrshah u la ong ba kane ka jingpynlut ka dei ban don ïa u pud u sam bad kane ka 26% kan dei ka kam kaba heh bha.
Ha kawei pat ka liang u nongïalam ka liang pyrshah u Dr Mukul Sangma uba la kren halor ka mat Chief Minister Special Development Fund u la ong ba ïa kane dei ruh ban shim jingkheiñ.