Ki Lai tylli ki Synod ki long kum ki Mawbyrsiew baskhem jong ka KJP Assembly’

Shillong, Rymphang 26: Ka Khasi Jaintia Presbyterian Assembly, mynta kala ïoh ïa ka ophis trei kam kaba thymmai hadien ba ki la kynriah noh na ka shnong Mission bad ïa kane ka ophis ba thymmai la plie paidbah da u Moderator ka Assembly u Rev. W.P. Marbaniang ha Central Ward, IGP Shillong.
Ha kane ka sngi ba plie ïa kane ka ophis ba thymmai jong ka Khasi Jaintia Presbyterian Assembly la wan ban sakhi lang ruh da ki Secretary jong ka Presbyterian Church of India, ki dkhot jong ka Executive Committee jong ka KJP Assembly, ki seng longkmie bad kumjuh ruh ki seng samla bad ki Pastor ryngkat bad ki nong shah khot sngewbha.
Na ka liang u Rev. M Shylla uba dei u Sr. Administrative Secretary ka KJP Assembly u la batai ïa ka history lyngkot ha kaba ïadei bad ka jingrah noh ïa kane ka ophis na Mission sha Central Ward, IGP.
“Ka daw ba pynkynriah noh ïa ka ophis na ka shnong Mission kadei namar ba ka building kala rim than kila don bun ki jingduna ki lah ban buh ha ka jingma bad ka daw kaba ar kadei namar baka jaka ka long kaba rit bad ka khapngiah bha” ong u pastor Shylla..
Shuh shuh u Pastor Shylla u la ong, Kadei halor kine ki nongrim, dei ha u snem 2018 ba ka KJP kala rai ban pynkynriah noh ïa ka ophis sha ka IGP namar ba ka long ka jaka kaba biang hapoh sor Shillong.
Ka jingshim rai ban pynkynriah noh ïa ka ophis KJP bad ban tei pat da kaba thummai kadei kaba la shim ha ka special business session bad dei ha u snem 2019 la sdang ban buh ia u maw nongrim, ïathuh u pastor.
Ïa kane ka ophis ba thymmai jong ka Khasi Jaintia Presbyterian Assembly, la tei ha ka jinglut kaba la kot haduh 8 klur duna.
Na ka liang u Chairman ba pynïaid ïa kane ka jingialang u Rev NS Phawa uba dei ruh u Chairman ka Trust Department u la ai jingïaroh ïa baroh lai tylli ki Synod ba kynthup ïa ka Synod Mihngi, Synod Pdeng bad ka Synod Sepngi da kaba u la ong ba kine ki lai tylli ki kylla long ki maw byrsiew ba skhem jong ka KJP Assembly.
Ha shwa ban plie ïa kane ka ophis trei kam ba thymmai, u Moderator ka KJP Assembly u Rev. W.P. Marbaniang u la ai nguh ïa u Blei ba la ioh ka lad ban tei ïa kane ka ophis ba thymmai bad la pynpaw ka jingsngewnguh ïa u blei uba la theh ki jingisnei.
U Moderetor u la ong ruh, Kane ka dei ka sngi jong ka jingsah jingkynmaw ha ka bynta ka histori jong ka Balang Presbytery ha Ri Khasi bad Jaiñtia, bad na bynta ki khun ki ksiew ha ki pateng jong ngi bad kin sa kylli kumno ka gospel kala ïaid bad une u maw nongrim u mut aiu.
“Kane ka jaka kaba ngi la pynïeng ïa kane ka ophis kan long kum ka shalangmat jong ka Balang Pyresbyterian, ha kaba bun ki briew kiba ïaid lynti na kane ka thain la ki long kiba ngeit ne ki bym ngeit kin sa ïohi ïa kane ka ophis jong ngi bad kin sa kylli kaei ka jingmut jong kane ka ophis Khasi Jaintia Presbyterian Assembly” ong u Moderetor.
Shuh shuh u Moderetor u la pynpaw, Ngam lah khlem da pynpaw ka jingsngewbuh bad kane ka burom ka leit sha ki lai tylli ki Synod kiba la kyrshan bor bah ïa ki jingdonkam jong ka Assembly bad khamtam ïa ka jingiatrei ïa ka kam u Blei bad ngim lah ruh ban ai nguh ïa ki nongïalam jong ka Assembly naduh bala sdang ïa ka.
Ha kane ka sngi la nang pynphuh shuh shuh da ka jingrwai bala ai da ki nongtrei jong ka KJP Assembly.