Nongpoh, Rymphang 24: Ka Meghalaya State Skills Development Society (MSSDS) Ri-Bhoi, kaba hap hapoh ka tnad Labour, Employment and Skills Development jong ka sorkar jylla, mynta ka sngi ka la pynlong ïa ka prokram pynrungkam ne ka Recruitment Drive ha ophis C&RD, Bhoirymbong Block na ka bynta ki khun samla ka dong ka thaiñ.
Ha katei ka prokram, la sakhi ïa ka jingbun ki samla wadkam kaba la jan kot sha ka hajar ngut kiba la wan pynrung kyrteng ïalade ban wad lad ha kaba ïadei bad ka ïohkam ïohjam bad jingïarap ban pyntbit ïalade ha ki kam bapher bapher, la ka long hapoh ka jylla, shabar jylla ne wat shabar ri ruh lyngba ka MSSDS.
Haba kren sha ki lad pathai khubor, u Bah Saibok Khriam, Skills Development Officer ka MSSDS Ri-Bhoi, u la ong ba ka jingthmu jong kum kine ki recruitment drive ka long ban plie lad ïa ki samla kiba thrang ban trei, khnang ba kin ïoh ka jingïarap ha ka liang ka jingpynbit bad jingïohkam.
U la pynpaw ka jingkmen ban ïohi ïa ka jingïashim bynta shitrhem jong ki samla ha Bhoirymbong, kaba pyni ba ki don ka mynsiem jingïakhun ban tei ïa ka lawei jong ki lyngba ki lad ba ka sorkar ka plie.
Shuh shuh, u Bah Saibok u la pyntip ba kane ka prokram kan dang bteng sa ha Umsning Block ha ka 26 tarik Rymphang, ha kaba la khmih lynti ba kin dang bun shuh shuh ki samla kiba wan ban shim bynta.
Na ka liang ka MSSDS, la kyntu ïa ki khun samla kiba dang wad kam ba kidei ban shim ïa kine ki kabu ksiar, kum ka jingpyntbit ïalade bad kyntiew ïa ka lawei kaba kham phyrnai.
