New Delhi, Rymphang 24: Hapoh ka jingïalam jong u Myntri Rangbahduh, Narendra Modi, la pynlong ïa ka jingïalang ba nyngkong jong ka kynhun Myntri, Sorkar Pdeng ha ka ophis ba thymmai jong u Myntri Rangbahduh, ‘Seva Teerth’.
Kane ka jingïalang bad kane ka jingtei ki long ka dak jong ka jingtei pat ïa ka India kaba thymmai. Da kane ka jingsdang kaba bha, ngi pdiang sngewbha ïa ka lawei kaba la tei da ki spah snem jong ka jingpyrshang. Hadien ka jinglaitluid, ka Ophis jong u Myntri Rangbahduh ha South Block ka la don ïa ka pateng da ki phew snem bad ka la kyntiew ïa ki jingangnud na ka bynta ka ka lawei. Ngi la thmu ban don ka India kaba ka jingpyrkhat jong ka ka long kaba tynrai, kaba ka dur jong ka ka long kaba mynta, bad kaba ka bor jong ka ka long kaba khlem kut. Mynta, ka Seva Teerth ka dei ka jingpynpaw jong kata ka jingïohi jngai, kaba kyntiew ïa ka burom jong ka India kum ka kmie jong ka synshar paidbah.
Ha kane ka sngi ngi kynmaw ruh ïa ka history jong kane ka jaka. La tei ïa ka ‘Seva Teerth’ ha ka jaka ba sah shipor ki shipai naduh ka por ba synshar ki phareng, kiba la kylla long kiba neh namar ka jingbym treikam shuh. Ka jingpynkylla ïa ka jaka bym treikam ba sah ki shipai sha ka jaka synshar ri kaba treikam ka long ruh ka dak jong ka jingpynthymmai ïa ka India.
Shuwa ka por synshar phareng, la tip ïa ka ri India na ka bynta ka jingkhraw jong ka ha ka liang ki tiar ki tar bad na ka bynta ka jingngeit tynrai jong ka. Ka jingmut jong ka Seva Teerth ka long kaba la pynshong nongrim na kine baroh ar ki jingmut. Da ka jingïasohlang jong ka kamram, ka jingshakri bad ka jingaiti lut, la pyrkhat ïa kane ka jaka trei ba kan long kaba kyntang kum ka jaka leit pilkrim.
Da kane ka jingïalang kaba nyngkong ha ‘Seva Teerth,’ ka kynhun Myntri jong ka sorkar pdeng ka pynpaw biang ïa ka jingkut jingmut jong ka ba man la ka rai ba la shim hangne kan long kaba la ïoh mynsiem da ka jingshakri ïa ki 1.4 billion ngut ki nongshong shnong bad kan pynïadei bad ka thong kaba kham heh jong ka jingtei ïa ka ri.
Na ka bynta jong ngi, ki jingngeit tynrai katkum ka riti synshar ki long ka jingpynpaw ïa ka jingaiti ha ka jingbah khlieh, kaba pynïadei ïa ka jingsynshar bad ka burom, ka jingïaryngkat kyrdan, bad ka hok jong ki nongshong shnong. Ka kolshor treikam jong ka ‘Seva Teerth’ kan shah ïalam ha kane ka jingngeit, ha kaba man la ka polisi ka ïadei bad ka jingmut tynrai jong ka Riti Synshar bad man la ka rai ka ïahap bad ki jingangnud jong ki paidbah.
Ka Kynhun Myntri jong ka sorkar pdeng ka pynthikna biang ba man la ka rai ba la shim ha kane ka complex kan long kaba la pynshong nongrim ha ka jingngeit ha u Citizen Devo Bhava. Kane ka jaka kan ym long ka jaka pyni ïa ka bor, hynrei kan long ka jaka ai bor ïa uwei pa uwei u nong India. Kawei pa kawei ka jingpyrshang jong ka jingsynshar na ‘Seva Teerth’ kan ïadei bad ka thong ban pynsuk ïa ka jingim jong man u briew ha ka imlang sahlang. Ngi pynpaw biang ïa ka jingkular jong ngi ban pynkhlaiñ ïa ka rukom synshar kaba shai, kaba don ka jingkitkhlieh, bad kaba sngewthuh ïa ki jingeh jong ki nongshong shnong.
Ka ‘Seva Teerth’ ka dei ka jubab ïa ka jingdonkam ïa ki jingtei na ka bynta ka jingsynshar kiba wanrah bujli ïa ka jingbymlah treikam da ka jinglong kaba thymmai, ïa ka jingbymsngew thuh jingmut da ka jingaiti lut, bad ïa ka jingartatien da ki jingpynbeit.
Da kane ka jingïohi jngai, hapoh ka jingïalam jong u Myntri Rangbahduh ka ri u Narendra Modi, ki rai ba la shim ha kine ki snem ba la dep ki la ai ka jingshai kaba thymmai ïa ka jingthmu jong ka jingsynshar. Ki jingkylla ha ka jingim jong ki million ngut ki nongshong shnong ki la pynskhem ïa ka jingshaniah jong ki paidbah ha ka synshar khadar.
Ha kine ki phew snem ba la dep, da kaba pyllait ïa palat 250 million ngut ki nongshong shnong na ka jingduk, ka ri ka la ïoh ïa kaei kaba mynshuwa la kheiñ ba kam lah ban long. Hadien jong kum kine ki mawmer ka don ka jingthmu ba jngai jong ka sorkar, ka jingthmu ba bniah, bad ka jingpyrshang ba khlem sangeh. Lyngba ka Ayushman Bharat, da ki million ngut ki la shah pynïasoh bad ka koit ka khiah. Hapoh ka Pradhan Mantri Garib Kalyan Anna Yojana, ka jingïoh mar bam ka la poi sha jan 800 million ngut ki nongshong shnong, kaba la pynkut noh ïa ka jingjynjar jong ka jingkyrduh bam. Lyngba ka jingshna palat 120 million ki paiñkhana hapoh ka Swachh Bharat Mission, da ki million tylli ki longing longsem bad ki longkmie ki la ïoh ïa ka jingim kaba don burom. Kine ki pyni ïa ka lynti jong ka jingsynshar, ha kaba ka thong ba kongsan jong ka polisi ka la long ban pynsuk ïa ka jingim jong ki nongshong shnong.
Kumjuh ruh lyngba ka jingtei palat 40 million tylli ki iing, da ki klur tylli ki longïing ki la ïoh jaka sah bad ka jingshngaiñ. La pynthikna ïa ka jingïoh ïa ka umbam umdih sha palat 12 klur tylli ki longïing ba thymmai ha ki jaka nongkyndong lyngba ka Jal Jeevan Mission.
Ka kynhun Myntri jong ka sorkar pdeng ka peit ïa ka jingkylla ha ka ïoh ka kot jong ka ri India kum ka jingïaid lynti kaba bteng jong ka jingpynkylla. Da ka jingngeit ha ka ‘Minimum Government, Maximum Governance’ ki jingpynkylla kum ka GST, DBT, bad ka Digital India ki la wanrah ïa ka jingsynshar kaba kham shai, kaba kham paka, bad kaba kham pynshong nongrim ha ki nongshong shnong. Ka rukom lum khajna khlem da hap leitmihkhmat dalade ka la kyntiew ïa ka jinglong hok bad pynskhem ïa ka jingshaniah jong ki nongshong shnong. Namar kine ki jingpyrshang, ka India mynta ka don ha ka kyrdan kaba khlaiñ hapdeng ki ri jong ka pyrthei kiba khlaiñ ha ka ïoh ka kot.
Ka Kynhun Myntri ka rai skhem ba da ka bor thymmai jong ka ‘Seva Teerth’ bad ka jingstet jong ka ‘Reform Express,’ ka India kan pynskhem ïa la ka jaka lajong hapdeng ki lai tylli ki ri kiba hakhmat duh ha ka ïoh ka kot ha katto katne por.
Mynta ka sngi, ka Kynhun Myntri jong ka sorkar pdeng ka aiti biang ïa lade na ka bynta ka jingkut jingmut jong ka ri ban ïoh ïa ka ‘India kaba la kiew shaphrang shuwa u 2047.’ Kane ka dei ka jingïaid lynti jong ka ri kaba jrong, ha kaba ki rai ba la shim mynta kin pynwandur ïa ka lawei jong ki pateng ban wan. Kane ka jingïalang kaba nyngkong ha ‘Seva Teerth’ ka pynkynmaw ïa ngi ba katba nang heh ka thong jong ka roi ka par, katta ka jingkitkhlieh jong ngi ka dei ban long kaba kham khlaiñ.
Kane ka complex kam dei tang ka jaka treikam kaba katkum ka juk mynta. Ka long ruh ka dak jong ka kolshor treikam kaba thymmai ha ka jingsynshar. Lyngba ka jingstad ba mynta bad ki rukom treikam kiba thikna, ka jingtreikam jong ka sorkar kan poi sha ki kyrdan kiba thymmai. Kawei pa kawei ka file ba la pyntreikam hangne, bad uwei pa uwei u karmayogi uba trei hangne, un ïoh mynsiem na ka kam ban pynsuk ïa ka jingim jong baroh ki nongshong shnong. Ka kynhun Myntri jong ka sorkar pdeng ka rai ban pynshlur ïa ka jingpyndonkam hok ïa ki jingdon jingem bad ban pynsted ïa ka jingïaid lynti kaba bteng jong ki jingpynkylla kiba ka ri ka la mad ha kine ki snem ba la dep.
Kane ka jingïalang kaba nyngkong ka pynskhem shuh shuh ïa ka jingngeit ba ka India mynta ka don ha ka por jong ka jingpynkylla, ha kaba ki polisi, ka jingthmu, bad ka jinglong nongïalam ki ïaid sha ka India kaba la kiew shaphrang. Ka kolshor treikam kaba thymmai kaba la ïoh bor na ka ‘SevaTeerth’ kan long ka nongrim na ka bynta ka jingkiew jong ka India kum ka ri kaba lah ban treikam, kaba khlaiñ, bad kaba lah ban shaniah halade.
Hapoh ka jingïalam ba shemphang jong u Myntri Rangbahduh ba donburom u Narendra Modi, ka kynhun myntri jong ka sorkar pdeng ka pynpaw biang ïa ka jingkular jong ka ban pynlong ïa ka ‘Seva Teerth’ kum ka nuksa ïa ka pyrthei jong ka jingsynshar kaba sngewthuh, kaba don jingkitkhlieh, bad kaba pynshong nongrim ha ki nongshong shnong. Ka kynhun myntri ka rai ba ha ka jingïaid lynti ban pynlong ïa ka ri India kum ka ri kaba la kiew shaphrang, kaba lah ban treikam, bad kaba lah ban shaniah halade shuwa u snem 2047, kane ka jaka kan long kum ka jaka pdeng kaba don bor ha kaba ïadei bad ki jingangnud jong ka ri.
