Khmih lynti myntri rangbah ban ïoh myntoi na ka khajna GST, Excise, VAT bad ka non-tax returns

Shillong, Rymphang 23: U Myntri Rangbah ka Jylla, u Conrad K Sangma u la ong ba namar ka jingpynthymmai ïa ka rukom pyniaid hapoh ka 16th Finance Commission ka Meghalaya kan duh nong kumba T. 1500 klur man la u snem kum ka bhah khajna na ka sorkar pdeng.
Haba kren sha ki lad pathai khubor hadien ba la wanrah ïa ka mang tyngka na ka bynta u snem 2026-2027, watla katta, u Sangma u khmih lynti ban ïoh katto katne ka jingmyntoi ha ka jingmih khajna na ka GST, Excise, VAT bad ka non-tax returns.
Halor ka jinglum khajna jong ka jylla kaba khlem ïahap ha kine ki snem ba la dep namar ka jingïakynad ha khappud bad ka Bangladesh bad ka jingkylla kaba slem ha ka jingtih scientific mining, hynrei la kyrmen ba ha u snem mang tyngka ban wan kan don ka jingktah kaba T. 200 klur ryngkat bad ka jinglong jingman ha ka jylla ba marjan kaba nang kiew.
U myntri rangbah u la ong ruh ba da ka jingtih scientific mining kaba la don lypa na ka bynta ka jylla, u la khmih lynti ba ka jingmih na kane ka bynta kan nang kham kiew.
Ha kajuh ka por, halor ki jingkren ba la pynmih ba ka Meghalaya (9.66 percent) ka dei ka jylla kaba ar ha ka jingkiew stet ha ka ri hadien ka Tamil Nadu (11.6 percent) u Sangma u la bynrap ba ïa kine ki jingkheiñ la shim na ka Sorkar India.
Shuh shuh, u Myntri Rangbah ka Jylla u la ong ruh ba ki don 2500 tylli ki Lower Primary School sorkar ha ka jylla ha kaba palat 2000 tylli la ai ïa ki iing skul thymmai ne kiba la maramot bad pynthymmai.