Shillong, Rymphang 23: Ki ar Dorbar Shnong ka Huroi bad Lahalein ki la rai ban pynlong da ka jingïaid paidbah ne Rally sha ophis treikam jong ka Jaiñtia Hills Autonomous District Council (JHADC) ban pyrshah halor ka Notification jong ka JHADC kaba pynmih ha ka 28 tarik Kyllalyngkot 2026 ban ithuh ïa ka Umpyrshin kum ka shnong kaba pura hapoh ka Elaka Rymbai, bad ka jingai sanad waheh shnong ïa u Johny Suchen.
Ïa kane ka rai ki ar Dorbar shnong ki la shim ha ka jingïalang kaba la long ha shnong Huroi, East Jaiñtia Hills District ha ka 23 tarik Rymphang.
Ha ka jingkren u Secretary Shnong Huroi u Ma Raja Suchen ula ong, ki ar Dorbar shnong kila rai ban pynlong da ka jingïaid paidbah lada ka JHADC kam lah ban weng hapoh arsngi ïa katei ka Notification ba ka la pynbna khlem ka jingtip ki shnong ba marjan khamtam ka Elaka Rymbai.
U Ma Raja Suchen ula kynnoh ba ka District Council kala shim kabu halor kane ka kam, namar ba ka Elaka Rymbai kam don ïa u Dolloi ba pura ba wat ïa Acting Dolloi ruh ka District Council kam shym la thung haduh mynta.
