Don haduh 92 tylli ki shnong ka jylla kiba hap ha khappud jong ka ri Bangladesh: Conrad

Shillong, Rymphang 23: U Myntri Rangbah ka jylla u Conrad Sangma ha ka sngi Nyngkong u la ong ba ki don kumba 92 tylli ki shnong jong ka jylla Meghalaya kiba hab hapoh u pud u sam jong ka ri Bangladesh bad ïa kine ki shnong la dep ban jied na ka bynta ki kam pynroi kiba hap hapoh ka Vibrant Village Programme -II.
Na ka liang jong u Sangma u la ong ba kine ki shnong ki la dei ruh kiba la ithuh da ka Ministry of Home Affairs (MHA).
“Ki shnong kiba la jied da ka MHA kim dei tang ka Meghalaya hynrei na ka bynta jong baroh ki jylla ha ka ri,” ong u Myntri Rangbah ka jylla.
Na ka liang jong u, u la pyntip ruh ba u Myntri ka tnat Border Area Development u Brening A Sangma dangshen u la dep ban kynduh ia u Myntri ka tnat ki Kam Pohiing u Amit Shah ban iasyllok halor ka Vibrant Village Programme- II.
U la ong ruh ba ym shym la don kano kano ka jingmang tyngka kaba la buh na ka bynta kine ki projek
Na ka liang jong u Myntri Rangbah u la pyntip ruh ha ka ïing ba ka sorkar pdeng ka ai ka jingkyrshan ïa ki shnong kiba don ha ki khappud la ka long ha ka surok, ka 4G Telecom, TV connection bad ka bording.