Ka jinglip light ba kam dei ka load shedding hynrei kadei ba pyntreikam ïa ka skhim RDSS: Conrad

Shillong, Rymphang 23: U Myntri Rangbah ka jylla u Conrad K Sangma ha ka sngi Nyngkong u la pynbna ba palat 76,957 tylli ki nar post ilektrik yn bujli ha baroh kawei ka jylla Meghalaya hapoh ka Revamped Distribution Sector Scheme (RDSS), ha kaba donkam ban pynlip na ka bynta ka jingtrei.
“Ka jingpynlip bording kam dei ka load-shedding… ki don ki post ilektrik kiba la bam sarang, palat 1,000 tylli ki transformer kiba tlod bor bad kiba la rim bha.Ki don ki wire kiba la don mynta la 30 snem,” ong u Sangma haba jubab ïa ka jingiatai halor ka jingkren jong u Lat ka Jylla.
U la pynshai ba dei ban pynlip noh ïa ka bording katba dang shna ban pynïeng ïa ki post ilektrik, ki wire bad ki transformer.
“Baroh kine ki jingpynthut…kim dei namar ka load shedding hynrei namar ka jingdonkam ban pyntreikam ïa ka projek”, u la ong.
U Sangma u la bynrap ba ka tnad bad ka MeECL kin pynbna lypa ia ki jingpynlip bording bad u la ong ba kane ka jingpynbna ka thmu ban pynbha ïa ka bording.