Da ka TSAS ladep ban leh jurip ïa ki shnong ba khring ïa ki nongwan jngohkai, ong u Myntri

Shillong, Rymphang 23: U Myntri ba dei peit ïa ki kam jngohkai pyrthei u Timothy D. Shira haba jubab ïa ki jingkylli ba la wanrah da u Bah H. S Kharpran u la ong ba ka dei ka jingshisha ba ki la leh ïa ka jingjurip haba ïadei bad ki shnong da ka Tourist Spot Assessment Survey (TSAS).
Ka jingshim ïa ka jingkheiñ kino ki shnong kiba lah ban ïoh ïa ka jingïarap ban buh ïa ka ïing basa ka shong ha ka jingdon ki jaka jngohkai pyrthei, kum ka Sohra, Mawsynram, Dawki kine ki jaka ba khring ïa ki nongwan jngohkai pyrthei.
Haba jubab ïa ka jingkylli bynrap da u Myntri Rangbah ka jylla u Conrad K. Sangma u la ïathuh ba ha kane ka jingjurip ïa ki shnong ki thaw ha ka jylla baroh kawei la shim kyllum ïa ki 43 tylli ki dong bad ha kine ki 43 tylli ki dong ki don 245 tylli ki shnong bad haduh mynta ka sorkar ka la mang pisa na ka bynta 877 tylli ki ïing basa.
Haba ïadei bad ki jingkylli kiba ki samla kiba apply bad ba la mang lyngba ka skhim PMEGP ka don ka jingshisha ba ki ïa kynduh ïa ki jingeh dei na kane ka daw ba ka sorkar ka la wanrah da kawei ka rukom pyntrei kam ban pynsted ïa ka jingïarap kaba dei lyngba ka sorkar jylla.
Kito ki samla kiba la ïoh ïa ka PMEGP lada kim pat shim ïa ka pisa ban sdang ïa ka kam ki lah ban sangeh noh ïa kane ka skhim bad kin wan noh ban shim na ka skhim jong ka sorkar jylla ha kaba ka sorkar ka ai T.10 lak T.7 lak ka dei ka Grant bad T.3 lak ka ram.