Sha Combodia yn leit wad bniah shaphang ka jingïadei ki Khasi bad Mon-Khmer lyngba ka DNA Test

SHILLONG, FEB 23: U Myntri Rangbah ka Jylla Conrad K Sangma ha ka sngi Nyngkong u la ïathuh ha ka Ïing Dorbar ba ka sorkar kan phah ïa ki nongwad bniah sha Cambodia ban wad bniah ïa ka jingïadei hapdeng ki Khasi bad Mon-Khmer lyngba ka jingtest DNA bad ka ktien ka thylliej.
Haba jubab ïa ka jingïakren halor ka jingkren jong u Lat ka Jylla, u Sangma u la pyntip ba ka sorkar kan sdang ïa ka micro-level studies shaphang ka jaitbynriew Garo-ba la ngeit ba ki ïadei bad ka Tibet-bad kan pynïar ïa ka kam halor ka histori bad ki tynrai jong ka jylla ha u snem mang tyngka ban wan.
Haduh 50 ngut ki nongwad bniah hapoh ka CM Research programme ki dang thoh ïa ki riti dustur bad ka kolshor ha kylleng ka jylla Meghalaya.
U Sangma u la ïathuh ba ka sorkar ka la mynjur T.15 klur na ka bynta ka Seng Khasi na ka bynta ka indigenous culture centre bad T.17.26 klur ban pynroi ïa ki jingdonkam ha Smit na ka bynta ka shad Nongkrem bad ka jinglehniam Pomblang, ha kaba T.13.56 klur la dep ban pyllait. La shna ïa ki kynroh bad ki jaka shong ki paidbah ha u Lum Pomblang.
Ka jingai pisa na ka bynta ka Heritage ka kynthup ïa ka T.50 lak na ka bynta ka open-air museum ha Wahmawpat ha Mawsynram-ka jaka shong jaka sah jong ka spah snem kaba 18-bad T.1 klur na ka bynta u Syrwet U Barim ban buh jingthoh ïa ki jingstad ba la kren da ka ktien.
“Ngi sngewthuh ïa ka jinglong tynrai bad ka jingdonkam jong kane ka jaka…bad ngi pynneh pynsah ïa ka histori ba riewspah jong ki briew jong ngi,” u la ong.