Shillong, Rymphang 23: Ka Federation of Khasi Jaiñtia & Garo People (FKJGP) Upper Shillong Circle ka dap da ka jingsngew sarong kaba khraw hadien ba i Kong Aihun K Lyngdoh Tron iba long i nongshong shnong jong ka Shnong Umlyngka, Upper Shillong iba trei pat kum ka Nongthoh khubor ka Jylla ha ka thaiñ East Jaiñtia Hills District iba bat ruh ïa ka kyrdan kum ka Senior Correspondent jong ka Lad pathai khubor jong u Mawphor & Highland Post lyngba ka jingïohpdiang jong i ïa ka khusnam “Best Journalist of Meghalaya” ha ka 20th Media Excellence Award 2026 kaba la pynlong da ka Media Federation of India ha PLB Auditorium, ITO, ha New Delhi.
I Kong Aihun K Lyngdoh Tron lem bad kiwei pat ki nongthoh bad nongpathai khubor na kylleng jong ka ri India iba long tang ma i marwei na ka jylla Meghalaya iba la ïohpdiang ïa katei ka khusnam ha kaba la sam da u Director General barim jong ka Indian Institute of Mass Communication (IIMC) u Prof. Sanjay Dwivedi, ha ryngkat ka jingdonlang u Senior Journalist u Prateek Trivedi bad u Deputy Director General jong ka National Informatics Centre (NIC) u Dr. LP Sharma.
Ka FKJGP Upper Shillong Circle ka sngew ban ai mynsiem shuh shuh ïa i Ka Kong Aihun halor ka jinglah ka jong i ban noh synñiang ha ka kam thoh khubor bad khamtam ban pynsaphriang ïa ki jingtip bad ïa ki khubor ki bapher bapher sha ki paidbah jong ka jylla Meghalaya ha kine ki 11 snem jong ka jingshakri ka jong i. Kane ka jingïoh khusnam ka jong i Kong Aihun K Lyngdoh Tron ka long ka burom kaba khraw shi katdei eh ym tang ïa i shimet hynrei ïa ka Shnong ka thaw, ïa ka thaiñ Upper Shillong bad kumjuh ruh ïa ka jaitbynriew bad ka jylla hi baroh kawei.
Ka FKJGP Upper Shillong Circle ka phah ruh ïa ka jing khublei Kitbok kitrwiang ha ryngkat ka jingkyrkhu kyrdoh ïa i Kong Aihun K Lyngdoh Tron ba in nang ïoh ïa ka met kaba koit kaba khiah ha ryngkat ka jingstad bad jing shemphang khnang ba in nang lah ban shakri khambha ïa ka jaitbynriew lyngba ka kam kaba I trei khnang ba kan long ruh ka nuksa ba bha ha ryngkat ka jing ai mynsiem ïa kiwei pat ki paralok kiba don ha ka kam thoh bad kam pathai khubor, ong ka kyrwoh ba la phah da u Bah Kitboklang Nongphlang, President FKJGP Upper Shillong Circle.
