Khot ka JTTA ïa kiba don Permit ha District Council Iawmusiang, ban wan sha ka jingïalang

Jowai, Rymphang 23: Ka Jaiñtia Tribal Trader’s Association (JTTA) kawei na ki seng kaba peit ïa ka jingbha jingmiat jong ki nongkhaïi hapoh ka Ri-Lum Jaiñtia kala pyntip paidbah sha baroh kito kiba don Permit ha District Council Iawmusiang hashwa ban pynkynriah ïa ka Ïawmusiang sha Lad Stadium ba kin wan sha ka Jingïalang Paidbah ka ban long Dorbar Hall jong ka Dorbar Shnong Tpep-Pale, Jowai.
Ïa kane ka jingïalang yn pynlong haka 28 tarik u Rymphang, 2026 haka por 11 baje mynstep na ka bynta ban ïakren haka jingïadei bad ka Iawmusiang District Council Shopping Complex, namar baka District Council haduh mynta kam pat shem la ai jubab ïa ka seng wat hadien ba la dep thoh haduh lai tylli ki shithi.
Kumta ka seng JTTA ka khot sngewbha ïa baroh ki trai dukan ba kin wan khnang sha kane ka jingïalang na ka bynta ban ïoh shim ïaka rai na kiba bun ba lang, pynkut ka kyrwoh na u President ma I. Najiar.