Hapdeng ka jingiphuh iphieng pynkut noh ka shnong Mawtnum ïa ka jingrakhe dap 100 snem

Nongpoh, Rymphang 20: Ka Dorbar Shnong Mawtnum, kawei na ki shnong kiba la rim ha them Ri-Bhoi kaba la seng naduh u snem 1924, haka sngi palei ka la pynhap pyrda noh ïa ka jingrakhe dap 100 snem ka jingïaid lynti jong ka shnong ha madan ïalehkai Mawtnum, hapdeng ka jingiphuh iphieng bad ka mynsiem jingïatylli.
Ka jingrakhe ïa kane ka spah snem kam shym la long tang ha kawei ka sngi, hynrei la sdang naduh ki bnai ba la leit da ki prokram bapher bapher kum ki jingïalehkai, jingïakop bad ki jingïalang ban pynphuh pynphieng ïa kane ka snem kyrpang.
Ha ka sngi pynkut, ka Dorbar Shnong ka la pynkup burom ïa spah ngut ki samla, ki rangbah bad ki longkmie kiba la noh synñiang shibun ha ki bynta bapher bapher, la ka long ha ka pule puthi, ka kam shnong, ka imlang sahlang bad kiwei kiwei, kiba la kyntiew ïa ka nam bad ka burom jong ka shnong Mawtnum hi baroh kawei.
Ïa ka jingïalang la wan ban sakhilang da u MLA ka Umsning Constituency, u Dr. Celestine Lyngdoh kum u kongsan, ryngkat u Deputy Commissioner ka Ri-Bhoi, u Abhilash Baranwal kum u symbud kongsan ha ka jingïadonlang ruh u Rangbah Shnong ka Mawtnum, u Bah Bathok Nongmalih, lem bad kiwei pat ki riew rangbah bad ki nongshah khot sngewbha.
Ha kane ka sngi la pynlait paidbah ruh ïa ka kot thup sah jingkynmaw jong ka shnong kaba kynthup ïa ka histori, ki jingïaid lynti bad ki jingjia ba kongsan naduh ba la seng ka shnong haduh mynta. ïakane ka kot la pynlait paidbah da ki kongsan hapdeng ka jingkmen jong ki paidbah nongshong shnong.
Ka jingrakhe spah snem ka Mawtnum ka long kum ka dak ka jingkiew shaphrang bad ka jingïatylli kaba skhem jong ka shnong ha kine ki 100 snem ba la leit noh.