Ngim pat ïoh ka kaiphod na ki Pulit, hadien ba ujor ejahar ba shah tuh pisa na Council: CEM

Shillong, Rymphang 19: U Chief Executive Member (CEM) ka Khasi Hills Autonomous District Council (KHADC) u Bah Winstone Tony Lyngdoh u la ïathuh ba haduh mynta kim shym pat la ïoh pdiang ïa ka report na ki Pulit hadien ba kila ujor da ka ejahar (FIR) halor ka jingshah tuh pisa na KHADC.
Ïa kane u CEM u la kren haba jubab ïa ka Zero Hour ba la wanrah da u MDC na Shella u Bah Barikupar Synrem, ha kaba la ïa shim byntatang da u nongialam ka liang pyrshah uba dei ruh u MDC ka Sohra u Bah Titos W Chyne.
U Bah Winstone Tony Lyngdoh u la ong, shen ha kine ki khyndiat sngi ngin sa ïoh ka kaiphod na ki pulit halor ka jingjia ba shah tuh pisa ar hajar tyngka na kawei ka karma trei kam hapoh ka ophis KHADC.
“Ngim dei ban buh pisa ne cash hapoh office” u la ong bad bynrap “Ngi lah buh ï ki kor CCTV naduh mynshwa bad ki don haduh 32 tylli bad ki dang don shuh shuh ki jaka ba ngi buh ïa ki CCTV” ong u CEM.
Shuh shuh u la ïathuh ba ki don haduh 7 ngut ki Chokidar kiba peit ïa ka Council bad napdeng kine ki 7 ngut ki don 4 ngut kiba don ha ka kam naduh ka por mynstep haduh ka por janmiet bad ki don 3 ngut kiba don ha ka kam ha ka por janmiet haduh ka por mynstep.
U CEM u la pynpaw yn ym lah ban teh lakam namar ba u nongtuh ha kano kano ka por u wan ngin ym lah ban tip bad kane ka jingjia kadei ka jingle rain ïa ka ophis.
Na ka liang u Bah Titos haba ïa shim bynta ha kane ka Zero Hour u la ong ba kane kam dei kaba phyla namar ba ïa u nongtuh ym tip ha kano kano ka por u wan bad ïa kum kine ki jingjia ym lah ban kiar, tangba ka ktah pat ïa ka burom jong ka ïing bad kane kadei ka sien ba nyngkong.
U Bah Titos u la pynpaw ba um kwah shuh ban dang ïohi ïa kum kine ki jingjia bad u la pynpaw ruh ba ïoh lehse kine ki briew kiba leh ïa kane ka kam ki lah ban dei ki briew kiba na ïing kiba kwah ban pynleh rain ïa ka ophis.
Shuh shuh u Bah Titos u la ai jingmut ïa ka EC ban buh shuh shuh ki CCTV bad ki ophisar ne mano mano ym dei ban buh pisa hapoh ophis ne ki karma trei kam bad la pynpaw ruh ba lada don ki nongpahara la donkam ban thoh sha ka sorkar ban pan da ki Home Guard.