Sdang ka KHADC ban phah ïatreilang ïa ki samla Khasi bad ki bar jylla, aiu kan jia ïa ka ri

Shillong, Rymphang 19: U Chief Executive Member (CEM) ka Khasi Hills Autonomous District Council (KHADC) u Bah Winstone Tony Lyngdoh u la pynpaw da kaba u la ong ba u Bawri u dei u genuine non-tribal ne u nong shong shnong ka jylla ki bym dei ki riewlum te kumno ngin kyntait ai u ban ai Trading License haba u la ïoh NoC na ka shnong.
Ïa kane u CEM u la pynpaw ha ka kynta kylli jingkylli ha ka sngi ba-ar jong ka dorbar mang tyngka jong ka KHADC ha ka por ba u Bah Titos W Chyne u la bynrap ka jingkylli halor ka jaka pynïeng kali ne ka parking lot ha Dhanketi kaba pynïaid da u bar jylla.
Haba jubab u CEM u la ong, Hadien ba la khot ïa kren ngi la bthah ïa u ban pynrung ïa u wei u samla Khasi bad ai kam kumba 90 % ki samla kiba sah ha katei ka thain bad une u samla mynta u la ïoh leh partnership bad u tei u bar jylla bad kumba kren u CEM la sngewthuh ba lah dep ban ai ruh ïa ka Trading License.
Haba bynrap biang u Bah Titos u la ong, Ngewtynnad ïa ka jubab bad sngewthuh jingmut halor ka jingle partnership, hynrei lada baroh baroh ki briew kiba nabar ïaid ban leh partnership bad ki bar jylla kaei ka ban jia ïa ka ri hadien habud bad na ka liang jon u CEM u khlem iathuh ia ka kyrteng jong u samla Khasi bad ong ban sa ai da ka list.
Shuh shuh na ka liang u Bah Winstone u la ai ka jingkular hapoh ka ïing dorbar ba ym dei ban sheptieng namar ba kim ai khleh biej namar ba ki don ki jaitkam bad haba ngi ai trading license ngi ai tang shi snem bad lada lah lah u trai ri ngin pynduh noh ïa ka license.
Haba phai halor ka jingkylli u Bah Ricky Shullai ïa ka jingpynkhein ki bar jylla ïa ka KHADC Act ha kaba iadei bad ka trading license, na ka liang u CEM u la ïathuh ba ki don haduh 45 ngut ki bar jylla kiba la pynkhein.
Haba kylli bynrap u Bah Ricky u la kyllai kaei ka jingpynshitom ne ka sienjam ba la shim halor kine ki briew, u CEM u la iathuh ba kip hah beit ban phah khang tala bad ha Laban ki don lai tylli kiba ka Dorbar Shnong kila wan sha khmat ban pyntip sha ka ophis bad la phah khang noh ia lai tylli ki dukan ha Last-top.
Shuh shuh u la pyntip ba ki don saw tylli ki travel agency ha Dhankheti bad hapoh ka jingialam u Superitendent ka Enforcement la khang noh bad kumjuh ruh ka don kawei ka company kaba trei kam khlem trading license kaba shu ïoh tang ka NoC na ka shnong bad ia kane ka Blinkit company la shah khang noh.
Ha kaba iadei bad ka jingleit khang ïa ki dukan, u CEM u la iathuh ba ki don ki khep ba ki enforcement ki ju ia trei lang bad ki Dorbar Shnong hynrei ha kiba bun ki leit beit katkum ka bor ba la ai ha ki.