Haduh `268 klur ka bai jaka ladep siew sha ki trai jaka ban shna National Highway ha rilum Garo : Bah Prestone

Shillong, Rymphang 19 : U Symbud Myntri Rangbah ka Jylla Bah Prestone Tynsong ha ka sngi Palei u la pyntip ha Ïing Dorbar ba ka bai jaka ne ka bai luksan ban shna ïa ka National Highway ha rilum Garo la dep ban siew sha ki 187 ngut ki trai jaka ha North Garo Hills bad 2,227 ngut ha East Garo Hills kaba kot baroh sha ka 268 klur tyngka.
Ïa kane u Symbud Myntri Rangbah u la jubab halor ka jingkylli ba wanrah da u MLA ka Kharkutta Rupert Momin da kaba ong ba ki trai jaka ba ïoh pdiang ïa ka bai jaka ki la kmen hynrei don pat kiba khlem pat ïoh. Katkum ka jingïathuh jong u Symbud Myntri Rangbah, ha North Garo Hills la pyllait haduh 43,90,69,924.52 tyngka sha ki 187 ngut ki trai jaka katba ha East Garo Hills pat la pyllait haduh 225,13,52,897.31 tyngka sha ki 2,227 ngut ki trai jaka.
“Kane ka bai luksan ne ka bai jaka ka kynthup lang naduh ka jaka ba shah ktah, ki jingtei, ki dieng ki siej bad kumjuh ki jingthung,” ong u Symbud Myntri Rangbah.
Shuh shuh nalorkata, u ong ruh ba na bynta katei ka jingtrei kumba 93-94 persen ka bai luksan la dep siew bad aiti pat sha ka National Highways and Infrastructure Development Corporation Ltd (NHIDCL)ïa ka jaka ban pyntrei noh ïa ka kam
Tangba u ong ba ki tip ruh ba ki don katto katne ki bynta kiba dang hap ban pynbeit ha kaba ki trai jaka kim pat hun bad ka rukom sorjamin jong ki bor distrik.
“Ha North Garo Hills ngi don saw tylli kum kine ki jingjia bad lai tylli na kine la dep tuklar da ki Arbitrator bad kawei pat kadei ka jingïajia jaka hapdeng ki trai. Kumta nga khmih lynti ba tang hapoh i por ba khyndiat ngin lah ban pynbeit noh,” u la bynrap biang.
Shuh shuh u ong ruh ba ki trai jaka lada kim hun ïa ka dor ba la buh da ki bor distrik ki don pat ïa ka hok ban ujor bad ïa kane yn sa peit pat da ki arbitrator ba la thung da ka sorkar.