Nongpoh, Rymphang 17: Saw ngut ki briew na kawei ka kompani kiba la wan sorjamin ïa ki jaka ha shnong Maikhuli, kaba dei ka shnong khappud hapdeng ka Meghalaya bad Assam, ki la shah pynher krad noh da ki nongshong shnong hadien ba la suba ba ki wan leh ïa katei ka kam katkum ka jingbthah ka sorkar Assam.
Katkum ka jingïathuh jong ki nong shnong, kitei ki briew ki la kam ba ki dei ki nongtrei jong ka Genesys International Corporation Ltd bad ki la wan ban sorjamin ïa ki jaka ha katei ka thaiñ. Hynrei, ki nong Maikhuli ki la ong ba kitei ki jaka ki dang hap hapoh u pud u sam jong ka jylla Meghalaya.
Ynda ki nongshong shnong ki la lap ïa ka jingdon jong kitei ki briew, ki la leit ban ïakynduh bad kylli jingkylli ïa ki halor ka jingthmu bad mano ba ai bor ïa ki ban sorjamin ha katei ka jaka. Hadien ka jingïakren, ki nong shnong kim shym la ailad ïa ki ban bteng ïa ka kam.
Da ka jingïatylli, ki nong Maikhuli ki la pynher krad ïa kitei ki saw ngut bad pynpaw shai ba ym shah ïa kino kino kiba wan sorjamin ïa ki jaka kiba hap hapoh u pud u sam jong ka Meghalaya khlem ka jingbit na ka jylla.
