54 tylli ki mawpud ladep ban thung ha ka thaiñ Hahim bad 83 tylli ha ka thaiñ Gizang, pyntip u Lat

Shillong, Rymphang 16: U Lat ka Jylla Meghalaya u CH Vijayashankar haba kren hapoh ka sngi sdang jong ka Dorbar Mang tyngka jong ka jylla ha ka sngi nyngkong ula ïathuh ba ka Meghalaya ka la shim ïa ka sienjam kaba kongsan ha ka ban ïapynbeit ïa ka jingïakajia pud bad ka jylla Assam da kaba pynïeng ïa u mawpud ha ki ar na ki hynriew tylli ki jaka ne sector ba la dep ïapynbeit mynshwa.
Halor kane u Lat u la ong, “Ka jingthung ïa u mawpud ha khappud ka Assam-Meghalaya ka dei ka sienjam kaba kongsan ha ka ban pyntreikam ïa ka Memorandum of Understanding hapdeng ka Assam bad Meghalaya na ka bynta ki hynriew tylli ki jaka ba ïakajia.”
U ïathuh ba ka jingphiah ïa u pud u sam ka dang ïaid mynta bad haduh 54 tylli ki mawpud lah dep ban thung ha ka thaiñ Hahim bad 83 tylli ha ka thaiñ Gizang.
U Lat ula ïathuh ruh ïa ka jingpynkhlaiñ ka jingpeitngor ha ki jaka khappud ka Jylla bad ka ri Bangladesh ban lait na ki jingma jong ka ri.
U la bynrap ruh da kaba ong, “Ka Jylla ka la pynkhlaiñ ïa ki bor pahara ha khappud ka Indo-Bangladesh lyngba ka jingïatreilang kaba ïajan bad ki BSF da kaba pynkhlaiñ ïa ki bor syntiat bad pynjur ka jingpeitngor.”
Haba ïadei bad ki bor treikam ka Tnad Pulit, u Lat ula pyntip ïa ka jingplie paidbah ba dang shen ïa ka Counter Insurgency & Jungle Warfare School ha Baghmara bad bynrap, “Kane kan pynkhlaiñ ïa ka jinglah ka Jylla ban ai jinghikai ïa ki bor pulit ba kyrpang ha ka jingïakhun pyrshah ïa ki kam kaikhlaw bad ki kam lehnoh.”
Shuh shuh u Lat ula ïathuh ruh ba ka Meghalaya ka la sdang ban pyntreikam ïa ki lai tylli ki aiñ kam bymman-Ka Bharatiya Nagrik Suraksha Sanhita (BNSS), Bharatiya Nyaya Sanhita (BNS), bad Bharatiya Sakshya Adhiniyam (BSA).