Sha u myntri ka sorkar pdeng ujor ka HITO ba pynkheiñ ka Sorkar Jylla ïa ka MMDR Act, 1957

Jowai, Rymphang 16: Ka Hynñiewtrep Integrated Territorial Organisation (HITO) hadein bala dep ban pan jingpynshai naka tnad Mining and Geology halor ka jingithuh ne ai jingbit ïaki Hynñiew tylli ki Cement Company na Jaiñtia Hills haduh 3 klur 28 lakh tam tons u Mawshun kum uta uba shu mih ryngkhat ne (incidental limestone).
Naka liang ka seng haka 9 tarik Nohprah 2025 kala pan ïaka jingpynshai naka sorkar jylla ha kano ka khyrnit jong ka Mines and Minerals (Development and Regulations) Act, 1957 kaba kdew ba ka sorkar kylla ka lah ban ai jingbit ïa kino kino ki marpoh khyndew khamtam ïa u Mawshun uba pyndong kam daki kharkhana dewbilat kum uta uba shu mih ryngkhat ne (incidental).
Hynrei naka liang ka sorkar jylla haduh mynta kam pat lah ban ai ïaka jubab, naka liang ka seng kala shim ïaka sein jam ban ujor shisyndon sha u Myntri ka sorkar Pdeng u Kishan Reddy u Myntri ba dei peit ïaki jingtih marpoh khyndew mynta ka 16 tarik Rymphang 2026.
Shuh shuh u General Secretary ka seng u bah Wanbun Dkhar ula ong ba ka jingithuh ne jingbit haka thup incidental ïa u Mawshun sha ki Cement Company ka pynkha roi ïaka jingtih Mawshun be ain (illegal mining) namar katkum ka RTI bala ïoh daka seng la lap ba ki don tang 35 tylli ki mining lease naka bynta u Mawshun haka thup minor minerals ha East Jaiñtia Hills bad 18 tylli ha West Jaiñtia Hills District.
Katba ki par Mawshun kiba pyntrei ki don da ki spah tylli bad kane ka long kaei kaei kaba ka sorkar ka hap ba leh eiei namar kane ka wan rah ïaka jingduh nong ka sorkar naki khajna marpoh khyndew. Kumba ka seng kala sakhi lyngba ka incidental approval ka sorkar Jylla la pynkut ka kyrwoh bala phah.