Ampati, Rymphang 15 : Ka Jawahar Navodaya Vidyalaya (JNV), South West Garo Hills, ka la pynlong da ka jingïakob pyni nam ïa ka jingshemphang jong ki khynnah skul halor ka Science bad kumjuh ha ka Mathematics (jingkheiñ) kaba la pynlong ha ka 10 tarik mynta u bnai.
Ha kane ka jingïakob la wan ban shim bynta haduh 32 ngut kynthup 16 ngut ha ka Science bad 16 ngut pat ha ka jingkhein.
Kine ki samla hapoh ka jingïalam jong ki nonghikai, ki la pyni ïa ka jingtbit jong ki hakhmat ki nongbishar bad kumjuh ha khmat ki nongwan peit da ka jinglah jong ki ban wanrah ïa ki jingshna kiba itynnad bha.
La pynshongkun shuh shuh ïa kane ka prokram da ka drama nalor kiwei kiwei. Ïa ka jingïakob la wan ban bishar da ki san ngut ki nongbishar hapoh ka jingïalam jong u Principal Abdul Ghani.
Kumta ha ka liang ka Mathematics (Junior), ki nongjop ki kynthup ïa ka Jaasritha Group, Mahruf bad Amisha, katba ha ka Senior category ka Mashuda ka la wan ha ka kyrdan ba nyngkong bud sa Debasish bad Majoni ha kyrdan ba ar bad Jannatul ha ka kyrdan kaba lai.
Ha ka Science (Junior) u Nilash, Niyan Miah bad Nebidita ki la ïoh ban khur ïa ki kyrdan kiba shakhmat katba ha ka Senior category, ka Shiba bad Burhan ki la ïa sam ïa ka kyrdan kaba nyngkong bud pat sa Deansangdho ha kyrdan kaba ar bad Amlan Das ha ka kyrdan kaba lai.
Kane ka jingïakob ka long ban pynshlur bad ai mynsiem ïa ki khynnah skul ba kin sngewtynnad bad pynleit jingmut ha ka Mathematics bad kumjuh ha ka Science.
