Lada ïa kiba tuh mobile na Glory plaza lah ban kem shaduh Jaiñtia, balei aidaw ba jngai ki par dewïong da ki kynta?

Hadien ka jingbthei ka krem dewïong ha Thangsko, la ïohi ïa shibun ki kyntien kiba ki heh jong ka seng NPP, ki la sei daw ha ki sur bapher bad kitei ki kynthup, ïa ka jingkren jong U Conrad Sangma, ha kaba ula ong ba kam long kaba suk ban khang lut ïa baroh 22 hajar tylli ki krem dewïong ha ka jylla.
Halor kane ka mat, hap ban ïa kynmaw ïa ki jingkren jong utei u heh ka NPP, ha u snem 2017-18, ha shwa ka elekshon MLA, ha kaba ula thad rkhiang ïa u Mukul Sangma, Myntri Rangbah ka jylla, ha katei ka por, na ka jingkhang dewïong bad u da kular, ba un ïakhun ban pyllait noh ïa u dewïong, na katei ka jingkhang jong ka NGT; hynrei kaba ngi dei ban ïakren, ka long, ba katei ka jingkhang dewïong, ka la treikam naduh u snem 2014 bad lada U Conrad, u leit khang tang kawei shisngi ruh, ha kine ki 12 snem, un jin da la lah ban khang ïa ki 3 ne 4 hajar tylli ki krem dewïong.
Mynta pat, ynda ki la ïap sa ki 30 ngut tam, la ïohi, ba ki heh jong ka NPP, ki la ïa sei daw, ha ki lad pathai khubor bad U Bah Prestone Tynsong, u ong ba ki krem dewïong, ki jngai palat bad ki pulit, kim lah shuh ban ïaid kjat haduh 4 ne 5 kynta sha kitei ki krem bad nangta sa U Ma Sniawbhalang Dhar, uba kren sa kawei ka sur bad kaba u ong, ba haba ki don kum kine ki jingjia, ka dei ban ïa sngew kitkhlieh lang bad nangta ki mih sa ki jingkren ïada ïa U Conrad Sangma, ba hana um dei ban hiar shuki kum u Myntri Rangbah ka jylla.
Ki jingkren, ki long tang ki kam da rapjot suda, namar ba kim don nia shuh da kumwei pat ban kren kobsob, kumba ki kren ha ki snem 20-21, da kaba ki ong, “lada don ka jingkit dewïong beaiñ, leit ujor sha ki pulit”.
Sa ka kam ban kem ïa kito ki jingpynïap briew, kiba tih dewïong beaiñ, kam dei shuh ka kam jong ki Myntri sorkar, hynrei la ïohi, ba ki ïa byrthen kum ki laren, hynrei kumba ki leit thwet ïa u nongtuh mobile shaduh Jowai, namar ba u tuh na Shillong, kumta ka dei ka kamram jong ki pulit, ba kin leh ïa la ka jong ka kamram, namar ba ki kyndon aiñ halor ka kam pynïap briew, ka kam tih dewïong beaiñ, ka jingthied tiar siat khlem ïoh jingbit; ka dei ka bynta jong ki pulit bad kam dei shuh ka jingïakren jrong thylliej na Secreteriat.
Sngew ïoh mynsiem ban ïohi, ba ki ophisar jong ka East Jaiñtia Hills, ki la ïaid shakhmat dalade hi ban kem beit ïa kito kiba donkti, nangta ban kurup ïa u dewïong, uba la tih beaiñ bad ban pynpra ïa ki tiar khlong dewïong bad haba ki la sdang, ki dei ban ïaid shakhmat bad ban aiti khlem pynslem, ïa ka jingtohkit sha ki tnat jong ka sorkar India. Kitei ki ophisar ki dei ki IAS, IPS bad ki dei ki nongtrei jong ka sorkar India bad lada ki leh bakla ïa kane ka mat, kan ktah jur ïa ki kam jong ki shakhmat.
Kawei pat kaba itynnad ne kaba i lyngngoh, ka long ba kat kane ka jingjia, ki ar tylli ki seng kiba shong hajrong tnum jong ka bos NPP, ki dang sngap beit jak haduh ha kine ki sngi, ha kaba kim nud ban ang tang shi kyntien ruh.
Kane kadei kawei na ki kam kiba ithamula shisha ban ïohi ïa kita ki seng riewlum kiba donlang hapoh ka sorkar MDA naduh ka 1 haduh kane ka 2 kaba mynta ha kaba i kumba ki ïa kyrsum lang bad ka ahor jong u dewïong sha ka thaiñ Jaiñtia Hills.
Kumba la aidaw ruh da u Bah Prestone Tynsong ba ki jaka tih dewïong beaiñ kidei kiba jngai da ki kynta bad ba ki pulit ka jylla ki la shem jingeh ban leit khynra ne ban kyndang naphang ïa kitei ki par dewïong beaiñ, kan jin da la bha shisha ban aiti noh ha ki shipai ban pahara bad leit khynra ïa kitei ki jaka.
Kumba la kdew haneng ba lada ki pulit ka jylla ne kiba don ha Nongbah Shillong ki la lah ban leit kem ïa kiba tuh mobile phone napoh ka dukan kaba don ha Glory plaza, Khyndailad shaduh sha Jaiñtia Hills, kan ym eh satia ïa ki Pulit ban iaid 4 ne haduh 5 kynta ban leit khynra ïa ki par dewïong beaiñ lym kumta kam myntoi ka jingïoh ne jingshah hikai pyntbit ban khynra lehnoh jong ki pulit ka naba kumba la ïohi ba ki kloi palat ban kem ne lap dien tang ïa ki kam runar ba leh da ki rit ki ria katba ki kam ba khraw ne ki kambah jong kiba heh ba haiñ, khamtam kiba don bynta bad ki nongïalam saiñ pyrthei kim nud ne na ym satia kiba aibor ne ai hukum ïa ki ban leh ïa kane ka kam.