Da u nongbishar ba la shong thait thung ka sorkar ban tohkit jingbthei ha krem dewïong Thangsko

Shillong, Rymphang 15 : Ka sorkar jylla ka la pynbna da ka kyrteng u Nongbishar ba la shongthait, u Justice RS Chauhan kum u Chairman jong ka Judicial Inquiry Commission ban tohkit halor ka jingbthei ha ka krem dewiong ha Mynsngat – Thangsko dang shen.
Kiwei pat ki dkhot jong ka Commission ki kynthup ïa u Ophisar IPS ba la shongthait, Bah H Nongpluh bad kumjuh u Ophisar IAS ba la shongthait, u Bah PS Dkhar.
Ka kam jong ka Commission kam dei eh tang halor ka jingjia ha Thangsko hynrei ruh ban ngam jylliew halor ka jingbteng ka kam tih dewiong beaiñ ha ka jylla.
Dang shen, ka Director General of Police, Kong Idashisha Nongrang ka la hukum ban thung da ka kynhun tohkit Special Investigation Team (SIT) kaba 9 ngut ki dkhot ban tohkit halor katei ka jingbthei ha krem dewiong beain.
Ïa ka SIT yn khlieh da u Dy. Inspector General of Police (Eastern Range) u Vivekanand S Rathore, kan wad bniah halor ka daw tynrai bad ruh halor ka jingpynkhein ïa ki hukum ka Iing Bishar bad jingbthah ka NGT bad ban phah ruh ïa ka kaiphod ha ka por ba la buh.
Shuh shuh la ong ba kane ka hukum na ka DGP ka kdew ba ka SIT kan pyntikna ba kane ka jingtohkit kan wallam sha ka jingpynkut bad ka hok katkum ki kyndon jong ka aiñ.
Kumban shu pynkynmaw biang, ka jingwad ban pyllait im hadien ka jingbthei hapoh ka krem beain la pynsangeh noh ha ka 09tarik hadien ba ka kynhun kaba peit bniah ka la pynkut ba ym don shuh kiba dang don.