Shillong, Rymphang 15 : Ka Sorkar Jylla ka la pynkynriah kam ïa u Superintendent of Police ka East Jaintia Hills Vikash Kumar hadien ka jingbthei ka par dewiong ha Mynsngat-Thangsko, myn ha ka 5 tarik Rymphang, kaba la shim ïa ka jingim ki 31 ngut ki briew. Ka khubor ka ïathuh ba ka jingpynkynriah kam ïa u SP ka dei halor ka nongrim ba ka jingtohkit jongka SIT kan long kaba khuid bad laitluid khlem kano kano ka jingartatien.
U SP ka Anti-Narcotics Task Force Pankaj Rasgania un shimti noh mynta kum u SP ka EJH, ong ka jingpynbna ba la pynmih da u Commissioner & Secretary ka Tnad kam Pohïing (Police) Bah CVD Diengdoh ha ka Sngi Saitjaiñ.U Vikash Kumar un shimti noh mynta kum u SP ka Anti-Narcotics Task Force, Shillong.
Kane ka hukum ka la mih ruh hadien ba ka Director General of Police Kong Idashisha Nongrang, ka la pynmih ïa ka hukum ha ka 12 tarik Rymphang, ban thung ïa ka Special Investigation Team (SIT) ba khyndai ngut ki dkhot, ka ban tohkit ïa ka jingbthei kane ka par tih dewiong beaiñ.
Ka SIT, ka ban khlieh da u Dy. Inspector General of Police (Eastern Range) Vivekanand S Rathore, kan wad bad pynthikna ïa ki daw tynrai bad ki daw ba lam sha kane ka jingjia, ban tohkit ïa ka jingpynkheiñ ïa ki hukum ki ïing Bishar bad ka jingbthah ka NGT bad ban aiti ruh ïa ka kaiphod hapoh ka por bala buh.
Ka hukum ka DGP ka la bynrap ruh ba ka SIT kan pynthikna ba ka jingtohkit kan poi sha ka jingpynkut kaba don jingmut bad ka jingai ïa ka jingbishar ba hok kat kum ka aiñ.
ïa ka jingwad ïa ki briew ba dang jah la pynsangeh noh ha ka 9 tarik Rymphang hadien ba ka kynhun ai jingïarap ka la pyntip ba ym don shuh ki briew kiba dang im.
14 ngut ki briew kila shah kem bad ki bor Sorkar ki ïathuh ba da ki hajar metric ton u dewiong beaiñ la dep ban kurup hapdeng ka jingkhynra kaba jur sha ki jaka sah jong ki nongbylla ha ki jaka ba don ki par dewiong.
