Na Tripura ïohkem ki pulit ïa u nongïalam ban pynïap ïa u dkhot ka ACHIK ha Rajabala

Shillong, Rymphang 14 : Ki pulit jong ka West Garo Hills ki la ïohkem ïa uwei uba la phet rieh sha Tripura uba don bynta hakhmat eh halor ka jingshah pyniap u dkhot ka ACHIK ha ka shnong Goalgaon hapoh jong ka Rajabala ha u bnai Kyllalyngkot. La ïathuh ba une u dei uwei na ki nongïalam ba hakhmat hakhmat eh halor katei ka jingjia.Da ka jingioh kem ïa une, mynta ka jingshah kem baroh kala kot sha ka 13 ngut.
Ha katei ka jingjia, la shim ïa ka jingim jong u dkhot ka seng ACHIK bad kane ka la pynmih ka jingïakynad ha ka thaiñ Rajabala ha u bnai bala dep.
Ki pulit ki la ïathuh, ba u Mozidul Islam uba na Bhaitbari, Rajabala uba dei uba hakhmat eh ula phet krad ban lait shah kem ha ki pulit bad ula leit ban phet rieh sha Agartala, Tripura.Hadien ka jingïoh ïa ki jingtip kiba paka, ka Special Team na West Garo Hills kala mih ha ka 12 tarik ban leit sha Agartala.
La shem ïa u Islam na kawei ka ïing kaba ula sah wai bad la kem ïa u lyngba ka jingïatreilang bad ki pulit ka Agartala bad la wan ialam noh ïa u sha Tura hapoh ka jingsynran ki pulit bad la ïalam ha ka ïing bishar ha ka sngi Thohdieng ha kaba ka la hukum ban set ïa u hapoh jong ka Judicial Custody.
Hashwa ka miet jong ka sngi Thohdieng ha ka 9 tarik u Rymphang, ki pulit ki la pynlong ïa ka jingkhynra ha Bhaitbari bad ki la ïoh kem ïa uwei uba la tip kum u Gulbahar Sheikh (45).
Hadien ar sngi, la kem sa ïa u Mominul Hoque (40) na shnong Sidakandi ha Rajabala hadien ka jingpynlong ïa ka jingkhynra. Ki pulit kim pat treh ban iathuh shai la ki dang don ne em kiba ki dang thwet ban kem namar ka jingtohkit kan dang ïai bteng.