Shillong Rymphang 14 : Da ki spah ngut ki khynnah skul, ki Nonghikai, ki bor pulit bad ki riew paidbah kiba trei mon sngewbha na ka bynta ki khynnah rit ki la ïa ïaid paidbah ha ka Sngi Thohdieng ha Mendipathar ban pyrshah jur ïa ka jingïashongkha khynnah ne pynïashong kurim ïa kiba dang khynnah ka rta ha North Garo Hills.
ïa kane ka jingia ïaid paidbah la pynlong da ka District Legal Services Authority (DLSA), North Garo Hills, hapoh jong ka NALSA ASHA SOP bad Bal Vivah Mukt Bharat
ïa kane ka jingïaid paitbah la plie da u Deputy Commissioner, Dr. Abhishek Saini bad la ïashim bynta da ki dkhot jong ka Royal Northern Riders, ki khynnah skul, nonghikai na ki skul bapher bapher, ki heh jong ka DLSA, ki pulit bad na ka Tnad Social Welfare (Child Protection Unit).
Hashwa ban pynlong ïa ka jingïaid paidbah, u District & Sessions Judge u Balaram Joshi, ula pynpaw halor ki jingeh kiba bun bad khamtam ka jingshah pynshitom ha ki kyndon aiñ ïa ka jingpynïashong kurim khynnah.
Ula pynsngewthuh ïa ki paidbah ïa ka rta kaba lah ban ïashong kurim bad ka banjur ba ka imlang sahlang ka dei ban don lang ïa ka jingkitkhlieh ha ka ban ïada na katei ka rukom leh.
ïa kane ka Rally la sdang na District & Sessions Court, Mendipathar bad la pynkut ha madan jongka Dilma Higher Secondary School, ha kaba ki nongïashimbynta ki la rah ïa ki jingthoh bad ki bannar, kiba thoh “Em ïa ka jingïashong kurim khynnah”, “Ai ba ki khynnah kin don ïa ka jingangnud ym ban ïashong kurim”, “Ka jingpynïashong kurim khynnah ka dei ka kam sniew” kum shi bynta ban pynsngewthuh ïa ki paitbah bad ban ïada ïa ka hok jong ki khynnah.
Kane ka jingïaid paidbah ka dei da ka jingthmu ban pynsngewthuh ïa ki paidbah, ban pynshlur ïa ka jingïashim bynta lang jong ka imlang sahlang bad ban pynkhlaiñ ïa ki jingpyrshang ban rat dyngkhong ïa ka jingpynïashong kurim khynnah ha ka district.
