Shillong, Rymphang 13: Ka Assam Rifles Sentinels Cup kan sa wanphai biang mynta u bnai ha kaba ka sienjam kaba 4 kan sdang naduh ka 17 haduh 27 tarik Rymphang 2026, bad ïa ki jingïalehkai yn pynlong ha ki jaka bapher bapher ha nongbah Shillong.
Ka Sentinels Cup ka la long ka dak jong ka kolshor ïalehkai phutbol kaba riewspah jong ka thaiñ Shatei Lammihngi. Kane ka lympung ïalehkai kaba la jer kyrteng na ka Assam Rifles, ki “Nongïada ïa ka thaiñ shatei lammihngi,” ka la sakhi ïa ka jingïashim bynta kaba shitrhem na ki kynhun ha kylleng ka thaiñ.
Ka lympung kaba khatduh, kaba la long ha u snem 2025, ka la wanrah lang ïa ki nongïalehkai phutbol kiba tbit, bad mynta u snem la khmih lynti ba ka jingïalehkai kan long kaba kham shongshit namar baroh ki kynhun, shynrang bad kynthei, kin ïaleh katba lah ban rah ïa ka nam lahduh.
Kumba ju long, ka Assam Rifles Sentinels Cup kan sakhi ïa ka jingïashim bynta jong bun ki klob kiba na ka jylla Meghalaya, kumjuh ruh na ka Assam Rifles, Indian Army bad Meghalaya Police. Kane ka lympung kan don mar phra tylli ki kynhun ha ka thup jong ki Shynrang bad Kynthei ki ban ïakhun lyngba ki group stage, bud sa ka wat ïakhun knockout.
Ka jingplie pyrda ïa kane ka lympung la buh ban long ha ka 17 tarik u Rymphang ha madan First Ground-SSA Stadium, Polo, naduh ka por 2 baje noh phaisngi. Ka phainal ruh kan long ha kane ka juh ka madan hadien shiphew sngi bad ka lahduh jong kane ka lympung kan rah sha ïing ïa ka song pisa kaba T.3 lak ryngkat bad ka Sentinels Cup Trophy.
Ka Assam Rifles ka dang ïai bteng ban pyndonkam ïa ka Sentinels Cup kum ka lad ban pynshlur ïa ki samla jong ka thaiñ ban kiar na ki kam lehnoh bad u drok, katba ka pynshlur ïa ki ban pdiang ïa ka bor ba bha jong ka kam ïalehkai.
Ka Assam Rifles ka thrang ban kyntiew ïa ki sap ïalehkai phutbol lyngba ka MoU jong ka bad ka Bhaichung Bhutia Football Academy bad ka Assam Rifles Public School (Sports), kaba trei shitrhem ban wad ïa ki samla jong ka thain kiba don sap ha ka jingïalehkai phutbol.
Da kaba tei halor ka pateng jong ki sienjam ba ladep, ka Sentinels Cup ka dang ïai bteng ban long kum ka rynsan ban pyni ïa ka sap ïalehkai phutbol jong ka thaiñ, ban kyntiew ïa ka jingiatreilang ha ka imlang sahlang bad ban pynsaphriang ïa ka mynsiem ïalehkai bad ka jingïatylli.
