`22 hajar klur mang ka sorkar pdeng ïa ka pule puthi hapoh jylla Meghalaya, ong ka Shazia Ilmi

Shillong, Rymphang 13: U Devesh Kumar, Member of Legislative Council, Bihar bad convenor, Budget Publicity Campaign na ka bynta ka North-East bad ka Shazia Ilmi, National Spokesperson, BJP ki la ong ba ka sorkar pdeng hapoh ka jingïalam jong u Narendra Modi kum u Myntri Rangbahduh ka ri, ka la theh bun ki kam pynroi sha kane ka thaiñ shateilammihngi naduh ba la shimti ïa ka sorkar ha u snem 2014 bad halor ka Meghalaya ka sorkar pdeng ka la mang T. 22000 klur tang ha ka pule puthi.
Ïa kane kitei ki nongïalam ki la ïathuh sha ki lad pathai khubor ha ka sngi Thohdieng haba kren shaphang ka mang tyngka jong ka sorkar pdeng jong une u snem 2026.
U Devesh Kumar haba phai sha ka jinghiar ka ïoh ka kot na ka daw jong ka jingwan ka khlam Covid 19 ha I snem ba la leit, u la ong ba ka sorkar pdeng ka la ïarap shibun bha ïa ki nongshong shnong ban pyndap ïa ki jingdonkam jong ki.
Kum uwei na kiba khmih ïa ka BJP ha Mizoram, u la ong ba ka mang tyngka ka dei kaba la leh da ka jingmut jingpyrkhat kaba biang bha wat hadien ba ka ri ka la mad ïa ka khlam Covid.
U la ïathuh ba tang ha u snem ba la dep ka jingpynlut ka la kiew sha ka 11.5%, naba u Myntri Rangbahduh u la pynpaw ka jingkwah ba ki skhim ka bha ka miat ki dei ban poi sha baroh ki nongshong shnong bad baroh ki dei ban ïoh ki lad jingmyntoi, nangta ban ïoh ka lad ba ïaryngkat ïa ki nongshong shnong ha ka imlang sahlang.
“Haba phai sha ki kam karkhana, ka sorkar ka la pynleit jingmut sha ka rukom ka juk kaba thymmai haba ïadei bad ka ïoh ka kot kaba ïaid lyngba ka biotechnology, khnang ba kan aikam aijam ïa ki nongshong shnong bad kyrpang ïa ki samla,” ong u Kumar.
U la ong ba baroh hapoh ka mang tyngka ka la don ka jingbuh kyrpang na ka bynta ki kam pynroi ha kane ka thaiñ North East naba mynshwa ka sorkar hapoh ka jingïalam jong u Modi ka ong mynshwa ban peit sha mihngi hynrei mynta pat ka ong ‘act East’.
Katba ka Shazia Ilmi ka la ong ba haba ïakren shaphang ka budget 2026 ym shym la shim da ka jingkheiñ (arithmetic) hynrei lyngba ki jingpynkylla na ka ri kaba dangkiew sha ka ri kaba la kiew.
“Kane ka Budget mynta u snem ka don ka jingkitkhlieh kaba khia bha. Shaphang ka NE, 85% jong ki district ki dei kiba paw hakhmat ha ki kam pynroi ba dang ïaid,” ka la ong.
Haba phai sha ka jylla Meghalaya, ka Shazia ka la ïathuh ba kumba T. 22000 klur ka sorkar pdeng ka la mang tang ha ka pule puthi naduh ka snem 2014.
Haba ïadei pat ba ki jingpynïasoh hapdeng ki nongshong shnong, ka Shazia ka la ïathuh ba kumba 80% na ki nongshong shnong ka Meghalaya ki dei kiba im ha ki thaiñ nongkyndong, kumta ka sorkar pdeng ka phai khmat ban kyntiew ïa ki lynti ki surok bad kumba T. 9, 600, klur ka untide fund la mang ïa ki nongshong shnong ka Meghalaya, ba kynthup ïa ki surok, ka ïoh ka kot ha ki kam jngohkai ban long ki lad kamai jakpoh.
“Lyngba ka jingpyndonkam ban pynlait ïa ka pisa lyngba ki bor technology, ka jingpynlait pisa ka la long kaba bha bad ka jingpyndonkam bakla ne lait tuh ruh ka la duna bha, bad dei hi ruh ba ka sorkar pdeng ka kwah,” ka la ong.
Ka la ïathuh ba ha Meghalaya, kumba 21.4 lak tylli ki Ayushman card la dep ban shna, kumba 14, 000 ngut ki briew ki ïoh jingkyrshan lyngba ka sengkam lajong bad T.
2.700.3 klur la buh na ka bynta ban shna ïa ki surok bah ha Meghalaya.
“Ka IT park ha Tura ruh ka la ïoh ka jingmang tyngka bad ka jingbuh ïa ka Viksit ka long ban pynlong ïa ka Meghalaya kaba shaniah dalade halade. Watla ïoh ki jingpyntip ba watla ka sorkar pdeng ka la theh bun ki jingmyntoi hynrei dang don kiba duh, kumta donkam ban ithuh khnang ba ki nongshong shnong kim dei ban duh ïa ki skhim sorkar pdeng bad ka sorkar pdeng kam kwah ban shu pynsuk beit, hynrei ban pynlong ïa ka Meghalaya ka bym shaniah eh ha ka sorkar pdeng.
Haba phai sha ka jingkylli jong ka jingwanrah ïa ka rel ha Meghalaya, khamtam ha East Khasi Hills bad Jaiñtia Hills, ka Shazia ka la ong ba ha ka jingshisha u Modi u kwah palat ba baroh ki jylla khamtam kane ka thaiñ ba kin pynïasoh bad ki lynti rel, naba la ïohi ha Mizoram ba ka ïoh ka kot ka la kiew bha, hynrei halor ka Meghalaya ka donkam ruh ïa ka jingmon jong ki nongshong shnong ba ynsa lah ban wanrah ïa ka lynti rel.