Shillong, Rymphang 12 : Ka North Eastern Space Applications Centre (NESAC), Umïam ka la pynlong ïa ka jingpynkhuid ïa ka wah Umïam kum shibynta ka jingrakhe ïa ka Swachhta Pakhwada naduh ka 02tarik haduh ka 16tarik mynta u bnai Rymphang.
Ha kane ka jingrakhe la snohkti lang naduh ki Saïantis, ki Ophisar bad ki nongtrei jong ka. Katkum ka kyrwoh la ong ba ha kine ki artaiew ki la pynlong bun tylli ki prokram kum ka jingpynkhuid ïa ka wah Umïam (Block 4), ka iew Umïam, ka phyllaw jong ka Umïam Dispensary bad ïa ka rudwah ha Pynthor (Bhoirymbong).
Shuh shuh la ong ruh ba ha kine ki sngi ki la pynlong ruh ïa ka jingkynduh lang bad ki khynnah skul, ki nongshong shnong ban pynsngewthuh ïa ka jingmyntoi jong ka jinglehkhuid bad kiwei kiwei ki prokram kiba dang ïaid shakhmat kaba yn pynkut haduh ka 16tarik mynta u bnai.
