Da ki rai ban pyntrei ïa bun ki projek la shim ha ka jingïalang ba 87 ka Brahmaputra Board

Shillong, Rymphang 11: Ka jingïalang kaba 87 jong ka Brahmaputra Board ka la long hapoh ka jingpynïaid jong u Dr. Ranbir Singh, Chairman, Brahmaputra Board ha Conference Hall, Courtyard by Marriott Hotel, Shillong, Meghalaya. Ha kane ka jingïalang la ïashim bynta da ki dkhot kiba kynthup ïa ki heh ophisar na ka sorkar pdeng bad sorkar jylla jong baroh ki jylla ka thaiñ shatei lammihngi kynthup ïa ka West Bengal bad la pynleit jingmut ha kaba bishar bniah ïa ki prokram kiba dang ïaid shakhmat bad ban ïakren ïa ki sienjam ba kongsan kiba ïadei bad ka jingpynïaid ïa ki tyllong um, ka jingshlei um bad ka jingtwa khyndew bad ka jingpynkhlaiñ ïa ki jaka treikam ha ki jaka harud ka wah Brahmaputra bad ka wah Barak.
Ïa ki rai ba la shim ha ka jingïalang kaba 83 jong ka Standing Committee jong ka Brahmaputra Board kaba la long ha ka 30 tarik u Kyllalyngkot 2026 bad 7 tarik u Rymphang 2026, la mynjur bad ki jingtyrwa ïa ka projek ba ïadei bad ka jingpeit bniah ïa ka jingtwa jong ki rudwah bad ka jingbuh hakhmat eh ïa ki lad ban pynduna ïa ki jingeh ha ki jaka haruh ka wah Brahmaputra; Ka jingjurip ïa ki bynta bapher bapher, ka Geodetic Survey bad jingtohkit na ka bynta ban sngewthuh ïa ka rukom tuid ka um, ka jingkheiñ ïa ki Physiographic Parameter & ki longitudinal profile bapher bapher jong ka wah Jiadhal ha ka jylla Arunachal Pradesh; ka jingpynkhreh ïa ka DPR na ka bynta ka jingweng ïa ka ktieh na ka Baguwa Cherra na Satero Miar Howur sha ka Wah Manu jong ka Birchandra Nagar GP hapoh ka Chandipur RD Block & ka jingshna ïa ka Sluice Gate ban pynbeit ïa ka rukom tuid ka um na Satero Miar Howur sha ka Wah Manu; ka jingpynkhreh ïa ka DPR na ka bynta ki lad ki lynti ban pynduna ïa ka jingeh jong ka jingshlei um bad ka jingtwa ki rudwah ha 13 tylli ki jaka ba lah ban shah ktah jong ka wah Barak, Silchar (Cachar), Assam, ka jingshna/ pynthymmai ïa ka pung ba don ha ka thaiñ ha Inamung Pat, Imphal East District, Manipur; ka jingpynlong ïa ki kam bad kiwei kiwei ki prokram hapoh ka Swacchata ha u snem mang tyngka 2026-27; ka jingpyntreikam ïa ka jingwad bniah na ka bynta ka jingpeit bniah ïa ka dewlynnong Majuli na ka bynta ka jingpynkhreh ïa ka DPR na ka bynta ki lad jingïada hapoh ki kam Phase- VI; ka jingpynthymmai ïa ka Master Plan jong ka dewlynnong Majuli; ka jingkyntiew ïa ka jinglong jingman ka wah Basistha kaba don marjan bad ka Brahmaputra Board Campus, Guwahati bad kiwei kiwei kidei kiba la ai jingmynjur ha ka jingïalang.
Ka Board ka la mynjur ruh ïa ka jingmang pisa ïa ka jingkheiñ jingdiah ïa ka mang tyngka bad ka Annual Action Plan jong ka Brahmaputra Board na ka bynta u snem 2026-27.
La pynlong ïa ki jingpynshai halor ka jinglong jingman jong ka jingaiti ïa ki projek ba la pyndep ba la pyntrei da ka Brahmaputra Board bad ka Standard Operating Procedure (SoP) na ka bynta ban pynkhreh ïa ki Master plan na ka bynta ban bishar bniah da ki Dkhot.
La shim ruh ïa ka rai ban kynthup ïa lai tylli ki master plan kata – ka Dibang-Disang, ka Noa-Dihing bad ka Rangit Master Plan kiba kheiñ kyllum ïa ki master plan kiba la ithuh da ka Brahmaputra Board sha ka 76 tylli.
Ki dkhot na ki Sorkar Jylla ki la ïasam ïa ki kam ba la shim halor ki rai ba la shim ha ka jingïalang bishar bniah jong u Secretary DoWR, RD bad GR ha ka 12 tarik u Nohprah, 2025, bad ka jingleit jngoh ïa ka dewlynnong Majuli ha ka 10 tarik u Nohprah 2025. U dkhot na ki Sorkar Jylla u la ïakren ruh shaphang ki skhim ba la shim ha la ki jong ki jong ki jylla.
U Chairman u la pynpaw biang ïa ka jingkut jingmut jong ka Brahmaputra Board ban kyrshan ïa ki jylla ba don hajan ka wah na ka bynta ka jingpynïaid ïa ki tyllong um kaba paka bad kaba neh ha kylleng ka thaiñ.
Ka jingïalang ban wan jong ka Board (ka jingïalang kaba 88) jong ka Brahmaputra Board kan long ha Guwahati.