ïakhih ka MJCTUA ban pyrshah ïa ki polisi bylla, rep bad khaïi pateng ka sorkar pdeng

Shillong, Rymphang 12 : Ka Meghalaya Joint Council of Trade Unions & Association (MJCTUA) ki la pynlong da ka jingïakhih paidbah mynta ka sngi hakhmat ka Shillong Civil Hospital ban pynpaw ka jingpyrshah jur ïa ki polisi treikam ka sorkar pdeng halor ki kam bylla sngi, ki kam rep kam riang bad ha ka khaïi pateng.
Ia kane ka jingïakhih la shim bynta da ki 10 tylli ki Trade Union jong ka sorkar pdeng, ki seng nongrep bad ka thong ka long ban ym ïashim bynta ha ki jingtreikam kata naduh ki bank, ki post office, BNSL bad kiwei kiwei ki ophis sorkar.
Ha kane ka jingïakhih la pyrta ïa ki kyntien kiba pyrshah ïa kine ki polisi treikam ka sorkar pdeng.
U General Secretary u bah Edward Lynshing u la ïathuh ba ki union ki dawa ban pyndam ïa ki saw tylli ki labor code namar kine ki pyntroiñ ïa ka hok ki nongtrei, kan pynduh ïa ka jingskhem jongka kam bad ka jingkyntiew bun kynta ïa ka jingtreikam ruh. Ki dawa ruh ban weng ïa ka Draft Seed Bill, Electricity Amendment Bill bad Sustainable Harnessing and Advancement of Nuclear Energy for Transforming India (SHANTI) Act.
U Amarjeer Kaur General Secretary ka All India Trade Union Congress (AITU) u la ïathuh ba ym duna ïa 30 klur ngut ki nongtrei sorkar kiba ïashim bynta ha ka jingïakhih.
Ki la kynnoh ba kine ki Labor Code kin wanrah ka jingteh mraw ïa ki nongtrei. Kiba la ïashim bynta ha ki jingïakhih ki kynthup naduh ki seng nongrep, ki samla pule, ki seng samla, namar ki pyrshah ïa ki polisi ka sorkar ha ka liang ka rep ka riang, pule puthi bad ka thungkam thung jam. Ki la kynnoh ba ka sorkar ka leh bym patiaw ïa ki jingdawa jong ki nongtrei bad ki nongrep hynrei ki kham aibor pynban ïa ki corporate.