Kem biang ki pulit sa 2 ngut halor ka jingbthei ka par tih dewïong be-aiñ ha Mynsngat-Thangsko

Shillong, Rymphang 12 : Ki Pulit ka Jylla ki la kem biang sa arngut ki briew, kynthup ïa u trai ka par dewiong lem bad u nongpyntrei ïa ka par, haba ïadei bad ka jingbthei ka par dewiong dang shen ha Mynsngat-Thangsko, East Jaintia Hills, kaba shim ïa ka mynsiem ki 31 ngut ki nongbylla.
Kine kiba shah kem ki dei kiba la ithuh kum u Process Dkhar na Sutnga bad u Tensing Suchiang ba na ka shnong Umlawang.
“Ngi la kem sa arngut ki briew. Uwei u dei u trai ka par dewiong bad uwei u dei uba pynïaid ïa kane ka par tih dewiong beaiñ” ong u Superintendent of Police Vikash Kumar.
Hashuwa kane, ki Pulit kila kem ïa arngut ki trai par, u Forme Chyrmang (36) na ka Shnong Jalaphet Pordung bad u Shamehi War (42) na Sutnga Pohwaiolong, kiba la shah thep hapoh ka judicial custody ba 14 sngi.
Ki Pulit kila tohkit ia ka jingdon kiwei pat ki briew kiba donkti ha ka kam tih dewiong beaiñ, kynthup ki nongbei pisa bad ki nongshalan ïa u dewiong na kane ka jaka.
Ka National Green Tribunal (NGT) kala khang pyrshah ïa ka jingtih dewiong thliew khnai ha Meghalaya naduh u snem 2014 namar ka jingjulor ka mariang bad ka jingsngaiñ ki nongtih par.