Shillong, Rymphang 12 : Ka ïing Bishar High Court ka jylla ka la mynjur ban ai por biang sa saw taiew ïa ka Sorkar Jylla ba kan aiti ïa ka kaiphod ba bniah halor ka jingithuh bad pynneh pynsah ïa ki jingtei ba la rim bha (heritage building), ki tiar hyndai bad ki jingtei ha ka Jylla.
Ka hukum, ba la pynmih da ka Division Bench ba kynthup ïa Chief Justice Revati Mohite Dere bad Justice W Diengdoh, ka bthah ïa ka Heritage Committee ba kan aiti ïa ka affidavit ba batai ïa ki sien jam ba bniah, kiba la shim ban maramot bad pynneh pynsah ïa ki jaka ba don ki jingtei ba la rim, kumba bthah hapoh ka kyndon 3 jong ka Meghalaya Heritage Act, 2012.
Ka ïing Bishar shuwa kane, ka la pan ïa ka kaiphod na ka Committee halor ka jinglong jingman jong ki jingtei kiba la rim bha bad ki khana ba ki don.
“Ia kane ka affidavit dei ban ai sha u Registry hapoh ka artaiew hadien ba dep ai sha u Amicus” ong ka ïing Bishar ha ka hukum ba pynmih ha ka 11 tarik Rymphang. ïa kane ka kam la buh ban bishar biang ha ka 11 tarik Lber, 2026.
