Halor ka jingbthei ka par dewïong : Ki jingjia aksiden kin jia beit yn ym kynnoh ïa ka sorkar : Pala

Shillong, Rymphang 12 : U President ka Meghalaya Pradesh Congress Committee (MPCC) u Ma Vincent H Pala ula pynpaw ba un ym kynnoh satia ïa ka Sorkar Jylla halor ka jingbthei ka par dewiong dang shen ha Mynsngat-Thangsko, kaba la shim ïa ka jingim ki 31 ngut ki nongbylla bad pynmynsaw ïa bun ngut.
“Haba ïadei bad ka jingjia ba dang shen, ngan ym kynnoh ïa ka Sorkar Jylla namar ki jingjia ba shu jia ryngkat (accident) ki ju jia beit hangno hangno bad ha kano kano ka por ki aksident ki dei ki aksident hynrei ki kam beaiñ ki ïapher bak-ly- bak” ong u Ma Pala haba ïakren bad ki nongthoh khubor ha ka sngi Palei.
Hynrei, une u Nongïalam ka Congress ula kynthoh jur pat ïa ka Sorkar halor ka rukom khmih bad peit ïa ka kam tih dewiong, da kaba kynnoh ba ki jingkular ba la ai da ki seng sainñ pyrthei ba synshar ka BJP bad NPP, ka la lam sha ki kam tih dewiong beaiñ.
U Bah Pala ula kdew ba u Myntri Rangbah Conrad K Sangma, uba bat ïa ka Tnad Mining, ula kular ban yn sa sdang biang ïa ka kam tih dewiong hapoh hynriew bnai hadien ba wan ha ka bor. Ula ong ha ka manifesto ka BJP ka la kob ba ka jingtih dewiong ha Meghalaya kan sdang biang hapoh ka 180 sngi.
“Kine ki jingkular la pynsngew ha Byndihati bad Nongstoin, kaba ai jingkyrmen ïa ki paidbah ba ïa kane ka kam yn sa pynbeit noh kham kloi. Sngewsih, kine ki jingkular ki khlem urlong, bad shet kylla ïa ka jingshaniah u paidbah”.
Ka BJP bad ka NPP ki la pheil ban pynurlong ïa kine ki jngkular jongki ha ka por election bad kine ki jingkular jongki ki la pynshlur pynban ïa kine ki kam tih dewiong beaiñ ong u ma Pala.
“ Kine ki jingkular jongki ki la pynkulmar jingmut ïa ki paidbah khamtam ïa kito kiba shaniah tylli ha ka kam tih dewiong ban ïoh kamai jakpoh. Ka long kaba eh ïa ka sorkar ban pynshai halor kane ka kam tih dewiong liew khnai bad pyntip ruh sha ki paidbah la kin shah ne em ba kane ka kam kan bteng. Kine ki jingjia kiba jia kumne tang ha Jaintia Hills katba ym ju don kaiphod ba jia kum kine ki jingjia ha West Khasi Hills bad ha Garo Hills kumta halor kane ka sorkar ka donkam ban pynshai sani” bha ong u ma Pala.