K a long kaba sngewsih bha ban ïohi jan man la ki lad pathai khubor, ki social media bad ha ki rynsan youtube ba don kiba ïap, kiba mynsaw jur bad kumta ter ter tang na ka daw ka jingkyrkieh palat ki scooty, ki bike bad ki kali ym tang ha ki surok bah hynrei wat ha ki lynti shnong ruh. Kane ka jingkyrkieh jong ki ym tang ba ka buh jingma ïa ka jingim jong kito kiba ñiah ïa ki arshaka ne ki kali hynrei ka buh jingma ïa kiba bun kiwei pat la ka long ïa kiwei pat kiba ïaid kjat ne kiba don ha ki kali arshaka bad kumjuh ha ki kali. Lada kren lei lei ïa ka jingshisha, kane ka jingkyrkieh khlemakor ka pynsyier wat ïa ki kmie ki kpa ban ïalam ïa ki khun ba kin jam na shilliang sha shilliang ka surok. Kumta la donkam ïa ki pulit pynïaid kali ban peit lem ha man ki jaka ba long pdeng bad ba don ki skul ba kito kiba pynher kali ne arshaka kin kham ïaid suki lem.
Ka mynsiem ka pang bad ka dohnud ka mong haba ki ïing ki sem ki mad ïa ka jingïap ba khlem dei por ki baieit ba thoiñ, khamtam lei lei haba ki ngat ne ïa tyngkhuh kum ha ki akisden kali. Ha kane ka jylla, kiba bun naki jingïap mynta ki wan ha kum ki aksiden kali, kaba teng teng ka dei namar ka jingñiah thurmur da lade, ne don pat ruh na ka rukom niah thurmur ki nongniah. Haba kren shaphang ka rukom ban ñiah ïa ki kali khamtam eh ha kine ki kali arshaka mynta, ym lah ban khlem da buh ïa ka jingkylli, kiba bun na ki nongñiah nangno bad kumno sha ki la ïoh driving licence, namar ka rukom ñiah jong ki, kam kdew pat sha katta ka phang ba kidei kiba la ïoh hok shisha ïa ka licence ñiah kali jong ki.
La ju ïohi ba man la ka step don kiba bun ki briew ki bym pat ban nang ñiah kali, ki pynlut ïa la ka por ban hikai, hynrei ngi tip ba kum kine ki briew kiba da ïaid da ka lynti ban shah hikai, suki pa suki ki nang bad ki kham tip ïa ki aiñ ki kanun ban ñiah. Hynrei, ha kiba bun ki aksiden, lehse don ruh ki nongñiah ba shu nang malu mala, pynban khlem jingtieng ne smiej ki shu kurup ruma la kum kiba nang eh, hynrei haba la bang lei lei sa ka rukom ban pynher sted, tang katta ki thung khohmoh ne ba kin thung bajli bad ki syllad shisha kat shaba shah, bad ha kaba kut, poi pat sha ka jingjia ba sngewsih wat haduh u pud sha ka lynti jong ka jingïap. Kaba kham ima eh ïa ka rukom ñiah kali dei na ki khun samla kiba dang shu sdang ban khie, kumba ong ki riew tymmen ka dang khluit bha ka snam katno tam lei lei haba ïoh ban rah ïa ki kali ba kham remdor, ki pynher la kum ki bym lap lieng shuh, hynrei kaba kut, haba ym lah shuh ban teh lakam, poi beit beit sha ka aksiden.
Nalor ba pynher sted, trei ruh sa ka dih ka bam, ka leh shongshit tem pynheh bha ïa ki sur jingrwai, kaba da shisha ym tang ba ka wanrah ïa ka jingma ïa kiba shong ne ïa u nongñiah, hynrei wat ïa ki briew kiba ïaid ha ki lynti ki syngkien, kaba teng teng shu shah syllad ei bad kylla dkoh ka kti ka kjat tang namar ka jingleh shongshit kaba shi khyllipmat ka wanrah pat ïa ka jynjar trah kaba shi rta ïa ki lanot.
Hangne la donkam shisha ban pyrkhing ka rukom ai license ne haba ai ruh donkam ban da ïoh ïa ki kot ki sla na ki skul ai jinghikai ñiah kali ba la ithuh daka bor ba dei khmih. Ha kajuh ka por donkam ruh ïa ki bor pulit ban talasi bha khnang ban teh bha ïa u lakam ïa kito ki riew shang miet ha ka por ba ki la shoh bha u khawiang, namar kiba bun na ki jingjia ha ki por mynmiet, lada wad bniah bha ïa ka daw, dei namar ba ka jabieng kam treikam shuh, katba ka kali pat ka la her sted shaba palat u pud tad haduh bym lah shuh ban tehlakam ïa ka, ha kaba kut, tynrah beit kat shaba poi.
Shuh shuh, ka aksiden ka kham jia ruh haba ïa beh ïa ka por, haba ong beh por, ka kynthup naduh ka beh kam beh jam, leit jingleit sha jngai, hangne ruh, kum ki briew, ban lait na ka jingma, kan kham bha ban mih kham kylluid ka por, khampher wat lada dei ban poi kham kloi, hynrei ha kaba kut, ka mynsiem ka ïoh ba kan shong palei bad ym don jingeh ban ïoh ban pyndep ïa ki kam ha ka por kaba la buh. Kumta, ban lah ban kham tyngkan ïa ki aksiden kali, kaba nyngkong eh, donkam shwa ban ïa sdang nalade, da kaba long adkar bha ha ka rukom ban ñiah kali.
