Baroh 60 ngut ki MLA kren lem ïa ka jingkiew dor ki marbam mardih ne ngin mih surok: JAC

Shillong, Rymphang 11: Namar ka jingsohsat ha ka jingïa kynduh jingeh kum ki nongtrei bylla halor ka jingkiew dor ki marbam mardih, ka kynhun ki nongtrei Muster Roll ka jylla kiba don hapoh ka lama Joint Action Committee (JAC) jong ka All Jaintia Muster Roll Workers & Labour Union kiba don haduh 45 hajar ngut, kila kyrpad ïa baroh ki 60 ngut ki MLA ba kin ïa kren lem halor ka jingkiew dor ki marbam mardih, ne kin hap ban mih hi sha surok.
Haba kren sha ki lad pathai khubor ka Kong Daïophi Ïakait kala ong kum ki nongbylla sngi ka jylla kila don ha ka khim khait namar ba ki marbam mardih kila kiew lut baroh bad ngi la ïohi ba ki ong ba la hiar dor ka GST ïa ki marbam hynrei hapoh ka jylla, ka pylleng bad u dai kila nang kiew dor shuh shuh.
Shuh shuh kala ong, ba kila dep ban ïoh ktien na u Myntri Rangbah ka jylla u Conrad K Sangma uba la ong ïa ngi ban ïai shah ba un sa khot ïa kren ïa ngi ha u bnai Kyllalyngkot hynrei mynta lah u sa u bnai Rymphang ruh u khlem pat khot satia ban ïa kren ïa ki jingeh jong ki.
Halor kane kala kyrad ïa u Myntri Rangbah ban shim khia ïa kane ka kam ban ïoh ïakren ha kaba ïadei bad ka jingeh jong ki nongtrei bylla sngi bad ha kajuh ka pork ala ai khublei ïa u uba la pyntrei kam ïa ka RCW.
Shuh shuh kala ong ba ka sorkar kmie ha u snem 2012 kala pass ïa ka labour code bad kiba bun ki jylla jong ka ri kila pyntrei kam, katba ka jylla Meghalaya kam shym pat la pyntrei kam satia ïa ka labour code.
Na ka liang u Bah KL Pariat uba dei u nongai buit jong ka JAC u la ong ba ka sorkar jylla kala dei ban pynbna paidbah ïa kia jingkiew dor ki mur jong ki marbam mardih khnang ba baroh kin iatip bad ruh ban pyntrei kam noh mardor ia ka labour code.
Kine ki 60 ngut ki MLA kila dei ban kren eiei halor ka jingkiew dor ki marbam mardih bad lada kim kren hapoh Assembly kine ki MLA ngi hap ban mih sha surok, u la ong.
Shuh shuh u la pynpaw ba kin ym ai shuh ka jingthoh sha u Myntri Rangbah halor kane ka jingeh ki nongtrei bylla bad kila pynkhren ba ha u bnai Lber ha ka taiew balai kin ïa mih sha surok namar ba ym don ba patiaw ïa ka jingeh jong ki.