2 taïew dei ban pynpoi ïa ka kaiphod jingjia ba ïap ki nongbylla par dewïong, thoh ka NHRC

Shillong, Rymphang 11: Ka National Human Rights Commission (NHRC) ka la phah ka jingthoh sha u Chief Secretary bad ka Director General of Police jong ka jylla Meghalaya, ha kaba ka la pan ïa ka kaiphod kaba bniah halor ka jingïap jong ki nongtrei kiba tih dewïong hadien ba la don ka jingjia bthei bom dynamite hapoh ka jaka tih dewïong beaiñ kaba ha Thangsko, jong ka East Jaiñtia Hill district.
Haba shimkhia hi halor kane ka jingjia, ka NHRC ka la ong ba ïa kane ka kaiphod dei ban pynpoi hapoh ki 2 taïew.
Kane ka kaiphod la khmih lynti ba kan kynthup ïa ka jinglong jingman ha kaba ïadei bad ki kam pynlait im, ki jingpynlut ne bailutksan sha ki longïing ki lanot kiba mad ïa kane ka jingjia ba sngewsih bad ka jingtohkit jong ki pulit kaba kynthup ruh ïa ki sienjam ban shim ba kum kine ki jingjia kim dei shuh ban dang wanjia biang hadien habud, ong ka NHRC.